Nagkabalik

Dear Tita Salie,

Tawga lang ko og Lhove, minyo, may usa ka anak. My problem is about my former BF, kay karon nagkabalik kami. Nagkabuwag mi sa una tungod sa among parents apan karon sige mi’g teks-teks. Love gihapon namo ang usa’g-usa. Kontento ra kuno siya bisan textmate lang mi. Naglibog ko karon. Pasabta ko, thanks.

* * *

Dear Lhove,

Abi nimo moabot usahay ang problema, ang hinungdan tungod ra usab sa atong binuhatan. May panahon nga kini tinuyo, ug may panahon nga kini wala dahoma. Nasayod man ka nga minyo ka na ug may anak na.  Mahimo nga ang imong panahon lahi na sa una ug angay nga ang nangagi imo na nga kalimtan aron dili maguba ang bag-ong tigbayon sa inyong kaminyoon. Ang Hebreohanon 13:4 nag-ingon. “Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan, kay hukman sa Diyos ang makihilawasnon ug ang mga mananapaw.” Sama sa usa ka salamin nga nabuakbuak, imo pa ba kini nga tibuk-on aron adto ka manamin? Duna ka nay bag-ong salamin karon ang imong kaminyoon, ampingi kini aron dili basa’g tan-awon sa katawhan ug ikaw mismo mahimong maayo nga kapanaminan sa uban nga ang inyong kaminyoon maoy dungganon. -- Tita Salie