Ang tinuod nga makasasala

Alas nuybe sa buntag. Nagsugwak sa mga tawo ang sala ni Judge Givero. Mga kauban ni Joshua sa klase ug iyang kahigalaan nagpunsisok aron  maminaw sa hukom sa huwes sa kaso ni Joshua nga paghupot og shabu.

Diha usab ang kihante, nga amahan sa uyab ni Joshua nga si Don Miguel. Nadasig si Joshua sa presensya sa iyang inahan nga gikan pa sa Hong Kong aron maminaw sa ipakanaog nga desisyon.

Alang ni Joshua wa’y angay ikauwaw sa sala’ nga gibutang-butang kaniya. Unya, gibasa na sa interpreter ang hukom sa huwes.

“Nakita sa hukmanan nga si Joshua Melodiya nakasala sa paghupot og tunga sa kilo nga shabu. Busa gihukman siya nga mabilanggo sa tibuok niya nga kinabuhi,” sa interpreter nga mibasa sa desisyon ni Judge Givero.

Hilak ug bakho misalida sa sala ni Judge Givero. Ang tanang naminaw wala makauyon sa desisyon sa huwes. Nakahibawo sila sa kabuotan ni Joshua.

Si Vilma nga inahan ni Joshua maoy grabe’ng nagminatay sa paghilak nga migakos ni Joshua. Apan lahi ang gibati ni Don Miguel.

Nahimuot siya sa desisyon sa huwes. Alang kaniya ang dako’ng kantidad sa salapi nga iyang nagasto aduna’y katumbas nga kaalautan sa uyab sa bugtong anak niya.

“Senyor huwes, akong gidawat ang desisyon nimo kanako, pero ako lang ihangyo nga tugotan ko sa pagtambong karong hapon sa pasidungog nga ihatag kanako sa among eskuylahan isip topnotcher sa Board Exam pagka Doktor sa tibuok nasud,” pangilyupo ni      Joshua sa huwes atubangan sa daghang tawo.

“Wa’y problema sa imong hangyo. Tugutan ka nako apan ayaw lang kalimot nga aduna kamo’y higayon sa pag-apelar sa desisyon,” matud sa huwes.

“Dili na kinahanglan senyor huwes, maluoy ko sa kahago sa akong inahan nga nanarbaho sa laing nasud aron lang kaming duha mabuhi ug makahuman ako sa akong pagtuon. Nahibawo ko, ang langit makiangayon, silotan niya ang tanan nga nagbinuang nako, dinhi sa yuta ug anaay langit giandam niya, kanako,” ni Joshua

Wala makatingog si Don Miguel, iyang abogado ug ang huwes. Ilang konsiyensya nagkahiusa nga tungod sa binandol nga salapi, sila ang tinuod nga makasasala. (Kataposan)