Naamiga sa FB

Diha nga didto na sila sulod sa kuwarto. “Oki lang ba nimo Mon nga mag-two piece lang ko nga magpamasahe?” matud ni Kenn.

Wala makatingog si Ramon gawas sa pagpahiyom. Mitutok kaniya si Kenn nga anam-anam na nga mihukas sa gisul-ob niini nga T-shirt. Gisunod niini sa paghukas ang iyang short pants nga maong.

Ang kahayag gikan sa gamay’ng suga nga nahimutang duol sa salamin maoy naghatag og dan-ag sa nagkulob nga lawas ni Kenn. Bisan sa dili kaayo hayag nga suga, apan milutaw gayud ang kaputi sa pamanit sa dalaga.

Samtang nagyabo og panghaplas si Ramon ngadto sa wala niya nga palad, apan ang iyang mga mata wala’y pupamilok nga nagsud-ong sa lawas ni Kenn, ilabi na sa igwad kaayo niini nga sampot.

Wala tuyoa ni Ramon nga nakapanglad-ok siya sa iyang lawas, ilabi na diha nga misugod na siya sa paghaplas sa buko-buko ni Kenn. Iyang nabantayan nga bugnaw ang kalawasan sa dalaga.

Nasabot niya nga wala magsirkular ang dugo niini sa kinatibuk-ang kalawasan ni Kenn ug maoy nakaingon nga wala kini sa maayong kondisyon sa panglawas.

Wala magtingog si Kenn nga nag-ubo sa kama. Human mahaplasi ni Ramon ang buko-buko sa dalaga, gisugdan dayon niya kini sa pagmasahe. Miagulo si Kenn tungod sa grabe’ng kalalim.

Hamis kaayo ang panit sa dalaga. Pinugngan ang kusog ni Ramon aron dili mobati og grabeng kasakit si Kenn. (Sumpayan)