May gitago ang kangitngit - Gula 86
Didto ra matulog si SPO1 Nicko Bernal sa police station. Pagkabuntag, wala pa gani siya makapanghilam-os, mibagting ang iyang cellphone. Ang tawag gikan sa 6666.
Gitubag dayon ni Nicko ug nabati dayon niya ang tingog sa misteryoso’ng babaye nga nagpailang pangulo sa kulto. Nagpahibalo kini kaniya nga atua na sa mga kamot sa mga Bangkulisan ang iyang anak nga si Barbie ug ingon man si Gelli nga iyang asawa.
Mura’g nahugno si Nicko. Ang nanawag wala makigsulti og dugay kang Nicko. Gi-off na niini ang kahimanan sa komunikasyon nga gigamit sa pagtawag kang Nicko.
Mihakop kang Nicko ang grabe’ng kabalaka. Natultolan gayud diay sa mga sakop sa kulto ang dapit nga gitagoan nila kang Barbie. Nakapangutana siya kun unsa man lang diay gihimo sa upat ka polis nga gipabantay ni Chief Inspector Dindo Raval sa iyang anak?
Nahingawa g’yud pag-ayo si Nicko sa kahimtang sa iyang asawa ug anak. Managlahi nga pagbati nanagsuhag sa kahiladman ni Nicko.
Gitaho gilayon ni Nicko ang nahitabo ngadto kang Chief Inspector Raval.
“Unsa?” sa hepe nga ingon sa dili usab makatuo nga natultolan gihapon sa mga sakop sa kulto ang dapit nga gitagoan nila ni Barbie nga anak ni Nicko. (Sumpayan)
- Latest
