May gitago ang kangitngit - Gula 83

Nakugang ang asawa ni SPO1 Nicko Bernal ingon man ang iyang anak sa kalit nga desisyon nga mamiya sila sa ilang pinuy-anan sa labing dali nga panahon. Nangutikuti si Gelli.

“Nameligro ang kinabuhi sa atong anak,” gipasabot ni Nicko si Gelli. “Siya ang sunod nga target sa kulto.”

“U-unsay kulto?” ni Gelli nga wala pa’y kasayoran mahitungod sa kulto nga naglihok karon sa lungsod sa Tinago kay wala pa man kini kasultihi ni             Nicko.

Gipasabot ni Nicko ang iyang asawa nga mga sakop sa kulto ang responsable sa pagpamatay sa mga batang babaye sa ilang lungsod ug nga si Barbie na ang sunod nila nga target.

Si Nicko mitug-an nga ang mga sakop sa kulto nga Bangkulis Black Brotherhood mopatay sa mga bata nga natawo sa Septiyembre 8.

Apan wala na niya pasabta ang asawa kun ngano nga buhaton kini sa mga sakop sa kulto.

“Bulawanon ang matag takna, Gelli. Kinahanglang mamiya kita karon dayon. Magpalayo kita niining dapita aron ilikay ta sa mga sakop sa kulto ang atong anak,” matud ni Nicko.

Wala na magdaghan pa og kutikuti si Gelli. Paspas niya nga gipanghipos ang ilang dad-onon. (Sumpayan)