Bulak nga mikupos

Naibog siya sa batan-ong kabit ni Mr. Hidalgo. Dato si Mr. Hidalgo, usa ka inila nga negosyante ug dunay mga dagko’ng negosyo sa gawas sa nasud.

Dinhi sa mansion ni Mr. Hidalgo usa lang ka hardinero si Ronaldo. Matag hapon, manaog si Elena ug moanha sa hardin ug magpakutlo og bulak nga rosas. Kun bahin sa edad tingali, ligas lang sila’g gamay. Si Ronaldo, 25 anyos ug si Elena tingali anaa pa sa 23.

Karong hapona nia na pud si Elena nagpakutlo na pud og bulak. Pero dili na kadtong pula, kun dili kadto nang bulok nga puti. “Ganahan lagi g’yud ko og mga rosas, uy, Ronaldo,” ni Elena pa ngadto sa ulitawo. “Sa gamay pa ko hilig na ko’g bulak...”

“Nia ang puti nga rosas, ma’am, o,” ni Ronaldo nga mitunol sa bulak. Gidawat kini sa kabit ni Mr. Hidalgo.

Gitutokan ni Ronaldo si Elena. Matahom. Mura’g artista ang iyang katahom. Nindot og lawas. Puti ang pamanit. Bus-ok ang lawas.

Suwerte si Elena kay nia siya papuy-a sa mansion ni Mr. Hidalgo ug gipahimutang g’yud siya sa tiguwang milyonaryo. “Abi nimo, no, Ronaldo, may sakit man ko. Adtong miaging bulan lang nako masayri diha nga nagpakonsulta ko sa doktor...” ni Elena.

“Unsay imong sakit, ma’am?” hinay ang tingog sa hardinero.

“Kanser, kanser sa utok. Mao diay nga magsige’g labad ang akong ulo. Ako na man nga gisultihan si Ramon niini, ug naguol siya. Matud niya, kinahanglan kuno ko nga maglipay. Tingali, gaba kini sa akong pagka ambisyosa,” hinay usab ang tingog ni Elena. “

Mitutok si Ronaldo sa kabit sa iyang agalon. “Ronaldo, may hinigugma ka na ba?” nangutana si Elena. “Wala pa g’yud, ma’am...”

“Mao ba. Kamao ka ba momasahe, Ronaldo?” ni Elena ngadto sa ulitawo.

“Kamao man, Ma’am,” dali nga tubag ni Ronaldo.

Tuod, didto sa lawak ni Elena sa mansion, gimasahean ni Ronaldo ang bus-ok nga lawas ni Elena. Sinemana ang pagtunga ni Mr. Hidalgo dinhi sa mansion. Unya, kalit lang nakurat si Ronaldo diha nga gigakos siya ni Elena.

“Ronaldo, angkona ko karon dayon, sige na...”

Ug nahitabo ang dili buot mahitabo, apan dili kini sala ni Ronaldo. Paglabay sa tulo ka bulan namatikdan ni Ronaldo nga mikupos si Elena.

Luspad na kaayo kini sama sa kaluspad sa puti nga rosas. Ug diha nga miabot ang tagal ni Elena, midanguyngoy paghilak si Mr. Hidalgo ug didto sa harden sa tugkaran sa mansion, midanguyngoy pud si Ronaldo ug diha’y kaba-kaba nga mitugdon sa puting rosas. (Katapusan)