May gitago ang kangitngit

Gula 81

Nahibaw-an sa lider sa kulto nga ang usa ka anak ni SPO1 Nicko Bernal natawo usab sa Septiyembre 8, ug usa kini sa ilang target nga patyonon.

Nabalaka kaayo si Nicko kay nameligro ang kinabuhi sa iyang anak. Naghinuktok si Nicko kun unsay iyang himuon. Kinahanglan malikay niya sa kadaot si Barbie nga iyang anak.

May misantop sa iyang hunahuna. Diha-diha mitindog si Nicko ug mipaingon sa opisina ni Chief Inspector Dindo Raval. Kinahanglan nga i-refer niya kining maong problema sa ilang hepe.

Nanuktok siya’g katulo dayon gihinay pagtukmod ang palid sa pultahan. Dihadiha nakita niya ang hepe nga naglingkod sa swivel chair atubangan sa lamesa.

Misaludo si Nicko. Mibalos pagsaludo ang hepe kaniya ug gisenyasan siya niini sa paglingkod. Milingkod si Nicko.

“May dako ko nga problema, sir,” mipadayag gilayon si Nicko sa iyang suliran.

“Problema?” nakasukna si Chief Inspector Raval nga mitutok kaniya. “Unsa ba kana nga problemaha?”

“Bahin kini sa akong anak nga si Barbie,” ni Nicko. “Ngano man diay?” sa hepe.

“Nanawag kanako ang pangulo sa mga Bangkulisan. Nasayod na sila nga si Barbie nga akong anak natawo sa Septiyembre 8, ug mao kini ang sunod nila nga target.” matud ni Nicko. (Sumpayan)