Ang tinubdan sa Kabadyangan

Ning unang buntag sa akong paghibalik sa among baryo, human moligdas ang daghang katuigan, nalingaw ko nga naglantaw sa daghang nanglaba, nagkalos og tubig ug nangaligo sa tinubdan sa Kabadyangan.

Kusog ang bul-og sa tinubdan sa Kabadyangan nga anaa gayud sa tiilan sa mahabog nga bungtod ug ang dinagayday niini nga mipatighulog sa ubos nga bahin, naporma og dakong linaw sa tin-aw nga tubig nga maoy gihimong kaligoanan sa katawhan.

Apan nausab na karon ang porma sa palibot sa tinubdan sa Kabadyangan. Gisemento na ang palibot aron pabor na kaayo ang manglaba. Ang linaw usab sa ubos gisemento na ang kilid sa wanang niini nga nahimo na gyud nga usa ka swimming pool.

“Jeth, matahom na kaayo ang tinubdan sa Kabadyangan. Lahi na kaayo niadtong mga bata pa ta...!” matud sa magulang ko nga si Freda.

Ang tinubdan sa Kabadyangan tipik na sa akong kabatan-on. Anhi ko kanunay maligo sa tinubdan kaniadto uban sa akong mga klasmeyt sa elementarya ug hayskol.

Ganahan ko nga maglangoylangoy sa tin-aw’ng tubig sa linaw. Dinhi ko makaila si Dalisay, akong katalirungan nga maoy kanunay ko nga ikauban og kaligo sa tinubdan. Lahi siya nga pagkabata, guwapa ug puti kaayo siya ug ako lang ang makakita niya.

Diha nga parehas na mi si Dalisay nga nag-edad og 16 ug migradwar na ko sa hayskol, nagkasinabtanay g’yud ang duha namo ka kasingkasing.

Haskang pormaha ug bigota ra ba sa lawas ni Dalisay, uy! Ang tinubdan sa Kabadyangan maoy bugtong saksi, diha nga pugos nga gitugyan ni Dalisay kanako ang iyang pagkababaye.

Mura’g lamat lang ang tanan nga nahitabo kanamo kay wala na gayud magpakita pa kanako si Dalisay human ko mapungil ang biyuos sa iyang pagkabulak. Hangtud nga migradwar ko sa kolehiyo ug nahimo’ng lisensiyado nga civil engineer. Milarga ko sa Saudi Arabia ug mitrabaho sa dako’ng construction company sa maong nasud.

Daghan ko nga mga babaye nga gikarelasyon nga gidimdim ko ang ilang katam-is. Apan gipalabi ko ang pagpabiling ulitawo sa edad nga 35.

Gikipat-kipat ko ang akong mga mata nga padayong naglantaw sa tinubdan sa Kabadyangan ning buntaga. Buot ko nga sutaon kun tinuod ba ang akong nakita.

Usa ka puti nga babaye nga nagsul-ob og bathing suit nga bigot ug porma kaayo’g lawas nga nagpahiyom ug nagpangamay kanako. Si Dalisay! Ug mao na lang ang akong namatngonan nga tag-as kaayo ang akong lakang nga mipaingon sa nahimutangan sa babaye nga engkantada nga maoy una ko’ng gugma! (Katapusan)