Naamiga sa FB - Gula 3

Mahinamon nga nagpaabot si Ramon sa reply ni Kenn. Nagtuo g’yud hinuon si Ramon nga dili magpasamok si Kenn kay sigurado nga lingaw kini kaayo uban sa iyang mga barkada.

Nakadawat siya og reply gikan ni Kenn nga gipaagi gihapon sa private message. Nakaginhawa’g lawom si Ramon tungod kay giimbitar siya ni Kenn nga moapas kaniya sa usa ka beach sa Marigondon.

Wala masayod si Ramon kun unsa ang iyang buhaton. Wala gayud siya magtuo nga mosugot si Kenn nga moapas siya sa beach. Giteksan ni Ramon ang iyang amigo nga may motorsiklo aron manghuwam siya’g kasakyan paingon sa beach.

Gisuwerte si Ramon kay wala mobalibad ang iyang amigo. Dili molakaw ang iyang amigo matag Sabado basta walay trabaho. Nakalugar g’yud si Ramon pag-apas kang Kenn.

Daku ang pagpasalamat ni Ramon sa Facebook kay tungod niini nagkasuod sila si Kenn bisan og wala pa sila magkita. Wala madugay, didto na siya sa ganghaan sa beach resort nga giingon ni Kenn nga tua siya ug ang iyang mga barkada.

Misulod si Ramon ug nagpahipi siya sa daplin. Gikuha niya ang iyang cellphone ug gipadad-an niya’g personal message si Kenn. Iyang giingnan nga miabot na siya sa beach ug anaa siya sa gawas.

Taud-taud, takulahaw lang nga adunay naniyagit nga mga babaye sa unahan sa iyang nahimutangan samtang nagpundok nga mitan-aw sa cellphone sa usa ka babaye.

Nasuta niya nga anaa diha sa mao nga grupo si Kenn. (Sumpayan)