Masuko nga papaulion og sayo

Dear Tita Salie,

Good morning. Just call me Marinna, 12 years old, from Lapu-Lapu City. Maglagot ko nila ni mama ug papa kay papaulion ko’g sayo, gikan school. Makapungot kay ang uban lagi nako nga mga classmates puwede ra man nga mopauli nga gabii na. Maayo ba ang gibuhat sa akong mga ginikanan? Pasabta ko, Tita Salie.

Dear Marinna,

Ang gibuhat sa imong ginikanan alang ra usab sa imong kaayohan. Ayaw kalagot kanila kay sila naglantaw lang sa imong maayo nga kahimtang.

Ang pagdili nila kanimo nga gabii na nga mopauli gikan sa school nagmatuod lang nga pinangga ka nila tungod kay sila dili gusto nga adunay dautang mahitabo kanimo. Ilabi na gayud kay nagkinabuhi kita niining kalibotan nga puno sa pagkadaotan.

Kuhai og basehanan kadto’ng batan-ong babaye nga gipatay diha sa inyo sa Lapu-Lapu kaniadtong miaging adlaw, bisan diha gani sa kaugalingong balay peligro diay gani, samot na kun anaa ka sa gawas. Ayaw gayud og ikahiubos ang gihimo sa imong mga ginikanan Marinna ug hinuon angay nimo sila nga pasalamatan nga naglantaw sila sa imong kaayohan. -Tita Salie