Naminyo’g engkanto

Ang Sityo Hungot-Bagol mao ang sityo nga gidungog nga pinuy-anan sa mga engkanto. Nahimutang kini sa kinatumyan nga balangay sa Magdugo.

Mga mag-uuma ang sagad namuyo sa maong dapit apan ang uban molugsong sa patag kay dili sila makaagwanta sa mga talan-awon nga ila sa mga engkanto.

Matag Biyernes sa gabii duna g’yuy makita ang mga mag-uuma sa sityo nga dilaab sa dako’ng daob sa kilid sa kahoy nga balete.

Ug makita nila nga duna’y bangkite nga gihimo. Duna’y magsayawsa-yaw, duna’y magkantakanta ug duna’y magbalakbalak.

Si Ekong nga anak ulitawo ni Silay-Martin nasakit og dugay. Ug usa ka hapon may guwapa nga dalaga nga mianha sa balay ni Ekong ug nagpaila nga siya si Adoracion nga usa ka doktora.

“Kay naluoy ko kang Ekong, ako siya nga tambalan, Nang Silay, Noy Martin. Usa man gud ko ka doktora ug anaa ang among pinuy-anan sa may dako’ng balete. Kaila man ko ni Ekong kay adto man ni siya magsag-oban sa tubod nga nahimutang sa may gate sa among balay. Kami ang tag-iya sa maong tubod, Nang Silay, Noy Martin...” ni Adoracion.

Sila si Silay ug Martin gibati’g dili tiaw nga kahibulong kay gawas nga guwapa kaayo ang mao nga babaye, karon pa kini nila ikahimamat aron tambalan si Ekong.

Tuod, naayo si Ekong. Ug matag Biyernes ikuyog ni Adoracion si Ekong paingon sa dako’ng punoan sa balete ug kaadlawon na siya nga mopauli.

“Nay, Tay, adto na ko mopuyo sa palasyo nila ni doktora Adoracion kay gusto ni doktora nga magminyo na mi,” pahayag ni Ekong.

“Usa ka engkantada si Adoracion, Nay, Tay, ug matud niya, gusto niya nga madato ta, aron dili na ta tamayon sa atong kapobre,” dugang ni Ekong.

Milabay ang usa ka bulan, kalit lang miasenso sila si Silay ug Martin. Nakapatukod sila’g dako’ng balay, daw mansion. Daghan sa ilang mga silingan ang nahibulong kun diin sila’g kuwarta.

Unya, usa ka hapon, adlaw’ng Biyernes, may kotse nga mi-parking sa tugkaran sa dako’ng balay nila ni Silay ug Martin.

Nakita sa ilang mga silingan nga usa ka guwapa nga babaye, daw Amerikana ang hitsura sa nagmaneho sa kotse. Pagkanaog niini, ilang nakita nga si Ekong ang kauban nga desente na ang sinenaan ug pustorawo na kaayo. (Katapusan)