May gitago ang kangitngit

Gula 71

Gipangutana sa hepe si SPO1 Nicko Bernal kun ngano nga nakasulti man siya nga ang nanawag mao g’yud ang lider sa Bangkulisan Black Brotherhood.

“Siya mismo ang miangkon atol sa among panagsulti, sir,” matud ni Nicko.

“Wala ka lang kaha binuangi sa nanawag kanimo?” matud ni Chief Inspector Dindo Raval.

“Nagtuo ko nga dili kadto usa ka binuang. Ang nanawag kanako mao mismo ang misteryosa nga babaye nga migamit sa kahimanan sa komunikasyon nga may numerong 6666,” ni Nicko pa.

“A-ang buot mo nga ipasabot nga usa ka babaye ang pangulo sa mga Bangkulisan? Oh, c’mon, Nicko,” sa hepe nga daw sa dili makatuo.

“Mao kana ang tinuod, Sir. Mituo ko sa gisulti sa maong babaye. Sa wala pa siya motug-an nga siya ang pangulo sa mga Bangkulisan, una na niya nga giangkon nga siya sakop sa maong pundok,” matud ni Nicko.

“Pero imposible, katuohan tingali nga usa siya ka sakop sa kulto. Pero kun siya mismo maoy pangulo mura’g maglisod ko pagtuo niana,” sa hepe.

“Bisan ako, Sir naglisod usab sa pagtuo niini. Apan inanay akong nakombinsi nga tinuod ang pangangkon niadtong misterosa nga babaye,” miinsister si Nicko.

Wala motingog si Chief Inspector Raval. Daw naghinuktok kini sa gipanulti ni Nicko. Namalandong kini’g maayo. (Sumpayan)