Tilaw sa katam-is
Gula 13
Nakita ni Arthur nga mura’g kahilakon si Shane. Karon natugkad niya nga adunay masakit nga kagahapon si Shane ug mao nga nakaingon siya nga Sayang na ang ilang panagkita.
Gikalipay sa hilom ni Art ang kasayuran nga gibutyag sa dalaga nga may pagtan-aw usab kini kaniya.
“Magpasalamat ko nga nakagusto ka ‘sab diay kanako Shane. Gusto ko nga magkasultihanay gayud kita pag-ayo.
Mamalhin ta’g laing lugar nga adto ta magka-estoryahanay g’yud kay hapit na manirado kining restaurant,” matud ni Arthur.
Nanggawas sila sa restaurant ug nagtindog sa daplin sa karsada. “Adto ta magsultihanay sa Plaza Independencia, maayo didto kay mingaw,” giingnan ni Art si Shane. Nanakay sila’g taksi ug dali ra sila nga nahiabot sa plaza.
Giagbayan ni Arthur ang dalaga pagsulod na nila sa plaza. Susama na sila og managhinigugmaay bisan og wala pa sila’y relasyon. Mao kini ang gitawag sa uban og “MU” kun mura’g uyab bisan og wala’y relasyon.
Pareho sila nga nagpakahilom ug mipaingon sa bakante nga lingkoranang sementado nga nagsandig sa punoan sa kahoy ug nag-atubang sa downtown sa dakbayan. Gipaphaan ni Arthur ang lingkoranan gamit ang iyang gibitbit nga Banat News.
Una nga milingkod si Shane. Mitupad si Arthur ug misikit siya sa dalaga. Giagbay niya ang tuo niyang bukton sa abaga sa dalaga. Gitumong niya kini aron mapasandig si Shane sa iyang dughan. (Sumpayan)
- Latest
