Tilaw sa katam-is
Gula 4
Wala g’yud magpadiki-diki si Shane sa pagdawat sa songbook nga gitunol kaniya ni Arthur.Dali ra kaayo nga nakapili og kantahonon si Shane. Gipunit dayon niya ang microphone nga diha ibabaw sa gamay’ng lamesa. “Dili ta magdugay kay kanta man kaha ang atong gianhi dinhi,” matud ni Shane nga nagpahiyom. Misugod pagtugtog ang pasakalye sa kanta nga gipili ni Shane.
“Wow,” nakatuaw ug miginhawa’g lawom si Art diha nga nasuta niya nga ang una’ng kanta ni Shane mao ang sikat kaayong awit ni Whitney Houston nga Saving All My Love For You.
Ang rason diay nga si Shane wala magpadiki-diki sa pagdapit nga mag-karaoke si Art tungod kay maayo man kaayo siya nga mokanta.
Mipakpak si Art pagkahuman ni Shane pagkanta nga mura’g sundog g’yud kaayo sa dalaga si Whitney Houston. Mipahiyom si Shane nga mitunol sa microphone kang Art.
“Ikaw na pud,” matud ni Shane. Gidawat ni Art ang microphone ug gidali pagpakli ang song book. Gi-encode dayon niya ang iyang kantahonon nga mao ang kanta ni Kenny Rogers nga You and I.
Nakabantay si Art nga mipahiyom si Shane nga namati sa iyang pagkanta. Wala makuntento si Art, giusban pa g’yud niya og laing kanta nga iya gihapon ni Kenny Rogers – ang I Will Always Love You.
Nakapanglingo-lingo si Shane nga naminaw ug mipakli kini sa songbook. Ang kauban niini nga si Lorena, nagpahiyom ra nga naminaw. (Sumpayan)
- Latest
