Si Undong Henyo gitugkan og sungay

Kilumkilom na ug niining mga orasa manawag na si Mina sa iyang mga anak aron manihapon na.

Tulo ang ilang anak ni Beryo, usa ra ang babaye. Ang kinamaguwangan mao si Lina, si Ikong ang ikaduha, ug si Undong Henyo ang ikatulo.

Sa pagtawag ni Mina, diha dayon sila si Lina ug Ikong apan wala si Undong Hunyo. “Asa man diay ang inyong manghod, ha, Lina, Ikong?” nangutana si Mina. “Kamo may nagduwa diha sa may karaang kahoy nga patay atbang sa dako’ng dakit?” matud sa inahan.

“Amo bitaw nga gipangita, Nay Mina, apan wala man g’yud namo hikit-i. Kaingon namo’g nagbinuang lang siya ug nagtagotago didto sa may dakit, apan bisa’g giunsa na lang namo’g tawag wala g’yud motubag, mao mipauli na lang mi dihang nanawag ka na.”

Kahilakon si Lina. Taudtaod nabati nila ang tingog ni Undong Henyo ug nadungog nila nga miabli sa pultahan.

“Diin ka, Undong Henyo?” ni Mina pa ngadto sa anak.

“Diha ra man ko sa may punoan sa dakit, Nay. Nakadungog man ko sa pagtawag nimo. Duna man gud ko’y kaduwa, si Alibukaw,” matud ni Undong Henyo.

“Alibukaw? Kuyawa gud anang ngalana, Undong Henyo,” ni Ikong nga mitingsi. “Alibukaw, parehas ra sa kabaw....”

Wala na lang motingog si Undong Henyo. Unya, nahasiga ang mga mata ni Lina diha nga may nakita siya sa may tampihak ni Undong Henyo.

“Hala, unsa man na, Undong Henyo. Mura man na’g sungay!” ni Lina pa nga nakurat sa iyang nakita. Gihikap ni Undong ang dapit sa iyang tampihak ug nakurat pud siya kay duna na siya’y sungay.

“Uy, sungay! may sungay ka Undong Henyo! Ginoo ko, unsa’y nahitabo nimo, ha? Mura ka na ma’g kabaw ana?” Puwerte nga lisanga sa inahan sa iyang nakita.

Unya miasoy si Undong Henyo nga nakahigala siya’g usa ka puti nga tawo nga may sungay ‘sab ug misaad kaniya nga hatagan siya’g bulawan nga kuwentas.

Tuod, milabay ang daghang mga adlaw kalit lang nadato sila si Mina ug Arcadio. Kay ang ila diay’ng anak nga si Undong Henyo may amigo nga prinsipe sa engkanto nga nagpuyo sa dako’ng dakit nga usa diay ka palasyo.

Si Undong Henyo wala nay gawasgawas sa balay kay misamot kataas ang iyang sungay nga susama na sa sungay sa kabaw. (Katapusan)