Ang mga tikasan

Sayo kaayo nga nagtapok sila si Baldo, Kaloy ug Gorio. Ang ilang gisabotan niining buntaga mao nga ang manok ni Baldo nga bag-o niyang pinalit gikan sa Negros maoy ilang dad-on sa pista sa Puting Bato inig ka Mayo 15.

Ang naandan nila nga himuon sa hiniktan nga ilang ipanulong og tari, ilang paminhoran pinaagi sa pagbitay og bato sa tiil niini nga ipalusot sa gawang sa hiktanan.

Sa mga dapit nga magpista nga adtoan nila, ila dayon nga ipanghambog nga ang dala nilang manok pinalit nila’g mahal ug dili na suklan sa ilang lungsod.

Ug tungod niini, mainilog gayud kay kadaghanan sa mga sugarol adto man mopusta sa ilang manok, apan ang ilang kuwarta adto nila ihilom pagpusta sa kontra sa ilang manok.

Pag-abot sa pista sa Puting Bato, sayo kaayo nga milarga ang tulo ka sugarol, sakay sa bus paingon sa maong lungsod.

“Gipaminhoran mo ba pag-ayo kana, Kaloy?” hagawhaw ni Baldo samtang nagdagan ang bus nga ilang gisakyan. Si Gorio wala’y timik nga naminaw kanila.

“Maayo kaayo, Bos, wa’y kuydawo,” tubag ni Kaloy nga masaligon kaayo sa kaugalingon. Tibuok gabii gud nga iyang gibitayan og bato ang tiil niini.

Human sila maniudto sa usa ka kan-anan sulod sa bulangan, hitarian ang dala nilang manok. Naghasi ang pinustaay sa pikas ug pikas. Ang kontra sa dala nilang manok mao ang manok sa mayor sa lungsod.  Gipalusot nila ang dala nila nga kuwarta pabor sa manok sa mayor.

Nagharong ang duha ka manok. Tubaon ang manok sa mayor ug buyogon ang manok nilang Baldo. Misuliyaw ang mga tawo nga nakapusta sa manok sa mayor kay ang manok nilang Baldo nagtuy-od lang ang mga tiil ug naglukso-lukso.

Ang tulo ka managkauban miabiba kunohay sa ilang manok, apan sa hilom gibati nila ang dako’ng kalipay kay ang gipaminhoran nila nga manok wala man gayud mulabok.

Gidabo-dabohan ang manok nilang Baldo sa manok sa mayor ug naligid kini sa yuta. Naminghoy kunohay sila si Baldo, Kaloy ug Gorio, apan may kalipay nga mialimbukad sa ilang dughan.

Mikisi-kisi ang manok nilang Baldo kay hapit na kini kabugtoi sa kinabuhi. Apan sa tantong sikad-sikad niini, nakataghap ang bulang niini ug napisok ang mata sa manok sa mayor.

Unya, pagkatangtang sa bulang, nagtulilik nga midagan ang manok sa mayor. Mibangon ang manok nilang Baldo ug gilutos ang manok sa mayor nga nag-iyagak. (Katapusan)