Gibawi sa mangtas ang asawa

Bisan sa pagdumili sa mga ginikanan ni Melia nga wala gyud sila’y gusto kang Dominico nga anak ulitawo nilang Saling-Tibur, wala gyud kini makasanta sa tim-os nga pagminahalay sa duruha. Ug ning maong situwasyon nila ni Melia ug Dominico nagtaban na lang ang duroha ug didto sila mopaingon sa isla Ata-Kugita nga gidungogdungog nga dunay daghang nagpuyo nga mga ungo.

Ug matud pa, ang amahan ni Dominico nga si Tibur taga didto kuno sa maong isla ug nia lang dinhi sa sitio Halaphalap maminyo kang Saling nga taga dinhi gyud sa sityo Halaphalap. Tungod ning pagtabanay nilang Melia ug Dominico sangko sa langit ang kaligutgot nilang Edith-Luis ug maong nagsuhol sila’g mga barumbado nga mga bagis ug giadto ang isla Kugita-Ata diin tua sila si Melia ug Dominico manimuyo ug nagluon na isip mga magtiayon.

Apan usa ka gabii niana kalit lang may mga armadong tawo nga misaka sa balay nilang Melia-Dominico ug kay wala man si Dominico sa balay ug si Melia ra ang nahabilin, maong napugos gyud si Melia pagkuyog sa upat ka mga armadong tawo nga sinuholan sa iyang mga ginikanan.

“Dili na ko mobalik didto sa amo, maluoy mo nako, ayaw tawon ko ninyo pugsa sa pagdala. Mahal nako si Dominico,” pakiluoy ni Melia ngadto sa mga armadong tawo.

“Wala mi mahimo, Melia, kay gisugo lang mi sa imong papa ug mama suwerte gani si Dominico nga wala siya dinhi karon kay nanagat, kay kun nia pa siya, amo gyud siyang patyon. Busa, tana, kuyog na lang namo aron dili ka mabun-og!” ang tingog niadtong bungoton nga lalaki. Mikuyog na lang si Melia aron dili pud madamay ang iyang bana kay ila ra bang patyon kun ilang makita.

Tuod, pagkahibawo ni Dominico nga gidala’g balik sa mga sinuholan sa mga ginikanan ni Melia ang iyang asawa, nakahukom siyang moadto sa balay nilang Melia.

Ug karong gabhiona, sayod siyang naa pa karon sila si Melia kuyog sa mga bagis naglawig pa sa dagat. ug tungod niini may gikuha si Dominico nga mura’g gamay’ng garapa ug may sulod nga itom nga lana.

Iyang gihaplas sa iyang lawas ug pagkataudtaod nahimo siyang mangtas nga ungo. Milupad dayon si Dominico. Ug didto siya motugpa sa pambot nga gisakyan nilang Melia ug iyang gipangbugno ug gikuniskunis ang mga armadong tawo ug gipanghulog sa dagat.

“Dominico!” ni Melia pa sa kalipay. “Maayo kay imo kong giapas.” (Kataposan)