May gitago ang kangitngit

Gipaulanan sa nagpungasi nga mga bala ang balay nila ni SPO1 Nicko Bernal. Maayo gani kay nakabantay si Nicko. Gipahapa dayon niya sila si Gelli ug ang iyang anak nga si Barbie kinsa nakasiyagit sa tumang kalisang.

Gidali pagkuha ni Nicko ang iyang armas didto sa lawak nilang magtiayon. Apan sa iyang paghibalik sa sala, nakabiya na ang sakyanan nga giluwanan sa armado nga mga tawo nga mipaulan og mga bala sa ilang balay.

Midali si Nicko pagduol sa nahimutangan nilang Gelli ug Barbie nga niining tungora, nagpabilin pa nga naghapa sa salog.

“Luwas na kamo,” matud ni Nicko nga mipabarug sa iyang asawa ug anak. “Misibat na ang mga tawo nga daotan.”

“Kinsa man kaha kadtong mga tawhana, Nicko?” nakapangutana si Gelli nga hangtud niining mga gutloa wala pa huwasi sa kahadlok.

“Ambot lang,” ni Nicko pa. “Pero nagtuo ko nga may kasuko gayud sila kanako. Tingali usa kadto sila sa napagan sa akong pagtuman sa katungdanan.”

Wala madugay may nangabot nga sakyanan sa kapolisan. May nakataho diay sa mga polis sa nahitabo nga pagpangrakrak sa gipuy-an ni Nicko. – Sumpayan