Bisan sa damgo lang

Nakapanglingo si Borgs.Sa edad nga 65 ug bag-o lang nabiyudo, wa siya magdahom nga mobati pa siya’g matuod nga gugma ngadto sa usa ka babaye.

Pagkadali ba nga mipitik sa iyang kasingkasing og laing gugma. Wa siya makatuman sa iyang gisaad sa mitaliwan niyang asawa nga dili na gayud mahigugma pa og babaye.

Bisan gud og senior citizen na si Borgs, dinhi sa ilang dapit sa Guadalupe, nainila man siya nga bohemyo sa mga babaye. Tsikboy siya gikan pa sa iyang pagkaulitawo.

Hilig gayud si Borgs og mga babaye, maedaran man, mabiyuda, batan-ong dalaga, lakip na gani ang mga dalagita basta nga iyang magustohan, dili niya katulgan kun dili matilawan.

Namatay sa konsumisyon ang iyang asawa nga retiradong maestra. Diha nga nahimo na nga senior citizen si Borgs, daw dili makatuo ang kadaghanan, nga agresibo, payter ug mokumbati pa diay siya sa natad sa seks.

Napamatud-an nila kini kay ang mga babaye nga makatilaw sa romansa ni Borgs magpangita ug mahigalam man g’yud kaniya.

Apan ang nakadaot ning bag-ong gugma ni Borgs karon kay minyo man ang babaye nga iyang naibgan, usa ka maestra nga iya ra nga silingan ug suod niya ang bana nga nagpadagan og lending nga negosyo sa tibuok Guadalupe.

May duha na ka anak si Eve uban sa bana niya nga si Lito. Nadebelop ang gugma ni Borgs sa 40-anyos nga maestra kay gawas nga sila managsilingan, kanunay man gud siya hatagan sa maestra og painit ug pamahaw sa dili pa kini moadto sa eskuylahan.

Sa paniudto ug panihapon ‘sab, hatdan g’yud ni Eve og pagkaon si Borgs. Nag-inusara naman lang gud si Borgs sa iyang balay human siya mabiyudo.

Ang duha ka anak ni Borgs nga pulos na mga lisensiyado nga nars ug doktor, tua naman sa Amerika nanarbaho.

“Sultihan na lang g’yud tika, Eve, sa matuod! Mibati g’yud ko og gugma nimo...!”

“Twing...! Kasiaw g’yud nimo, Noy Borgs, uy! Minyo tawon ko uy! Ug suod baya mo nga amigo si Lito,” matud ni Eve.

“Nahibawo ko, Eve! Apan pasagdi na lang ning gugma ko nimo! Kuntento na kaayo ko nga makita ka ug daugon ko na lang sa imahinasyon nga maangkon ka!”

Nahikatawa si Eve. Nakapanglingo ‘sab si Borgs. Igo na nga mahigugma siya kang Eve ug malipay na lang siya nga maangkon ang maestra nga silingan bisan sa damgo man lang. (Kataposan)