May gitago ang kangitngit

Gula 36

Gitug-anan ni SPO1 Nicko Bernal si PO3 Cañares nga base sa pamahayag sa ilang hepe ang kulto nga Bangkulis didto magsugod sa India.

“Ang mahinungdanon mao nga mailhan nato kun kinsa ang mga sakop sa kulto aron sayon na lang unya ang pagsulbad sa pagpatay sa tulo ka bata,” giingnan ni Nicko si PO3 Cañares.

Human sa paniudto, gibasa pagsubli ni Nicko ang libro nga itom og hapin. Namasin siya nga sa pagbasa sa maong doktrina mapadali niya ang pagsulbad sa kaso nga pagpatay sa mga batang babaye sa lungsod sa Tinago.

Unya...diha’y iyang nabasahan nga nakapaungot sa iyang mga mata. Nadani siya sa kasayuran nga iyang nabasa.

Sa panid 666, nabasa ni Nicko nga ang mga sakop sa Bangkulis Black Brotherhood adunay patik. Ang mata’g tawo nga magpasakop sa maong kulto pagapatikan gayud og sungay diha sa wala niini nga kumagko sa kamot.

Base sa maong doktrina nga ang patik nga sungay nagsimbolo sa ilang pagsimba ni Satanas.

Nahinumdom si Nicko sa gitug-an sa amahan sa bata nga gipatay nga ang miadto sa ilang balay may patik nga sungay ang kumagko sa kamot. (Sumpayan)