May gitago ang kangitngit
Gula 35
Nasayran ni SPO1 Nicko Bernal nga ang mga tawo nga miadto sa balay sa bata sa wala pa kini mahanaw, dayon gipatay ug gilabay didto sa Lawis nagpatuo nga sila taga Statistics Office.
“Nagtakuban lang sila nga taga Statistics aron dili kamo magduda apan ang ila g’yud nga tumong mao ang pagpangespiya kun kinsa sa mga bata dinhi nga dapita ang natawo sa Septiyembre 8,” giingnan ni Nicko ang ginikanan sa biktima.
Nagkatinan-away ang magtiayon sa ilang nadungog.
Human sa ilang panagsulti, misakay gilayon ang mga polis sa ilang patrol car ug namalik sa police station. Sa ila na nga paghiabot, nakigsulti si PO3 Roy Cañares kang Nicko.
“Tinuod ba gud to ang gipanulti nimo kaganina, sir?” ni Roy.
“Ngano man diay? Nagtuo ka nga nagkomedya lang ko?” bawos nga pangutana ni Nicko kang Roy.
“Mura man gud og dili katuohan, sir. Aduna ba go’y kulto nga mopatay og tawo tungod sa ilang pagtuo?” dugang ni Roy.
“Bisan ako naglisud pagtuo niini sa sinugdanan. Pero inanay ko nga nakombinser sa pagpasabot ni Chief Inspector Dindo Raval kanako. May diyutay diay siya nga nahibaw-an kalabot sa maong kulto. Nabasahan kuno niya sa libro,” pasabot ni Nicko -- Sumpayan
- Latest
