Kun manguyab dili sugton
Dear Tita Salie,
Tawga lang ko’g Joseph, 19 years of age, ulitawo. Dili g’yud ko guwapo apan daghan na ang mga girls ang ni-admit nga ganahan sila nako. Ganahan ‘sab kun makadungog sa ilang mga pagdayeg. My problem kay di man ko sugton sa girl nga akong panguyaban. Basted man ko kanunay! Ngano man? Pasabta ko.
* * *
Dear Joseph,
Sa dili ka pa manguyab sa maong babaye, aduna’y pipila ka butang nga importante nimo nga kat-onan. Una, ugmara ang maayo nga pamatasan. Ang maayo nga pamatasan nagtahod usab sa uban. Ang maayo nga pamatasan dili sama’g sinena nga nindot kaayo aron modayeg ang uban apan puyde nimo nga hukasan inig-abot sa balay.
Hinumdumi nga ang maalamong babaye naniid kana sa pagtratar nimo sa imong pamilya. Sunod ang pamaagi sa imong pagpakig-estorya. Ang maayo nga komunikasyon mao kana ang mopalig-on sa relasyon.
Ayaw palabi og hisgot sa butang nga imong giganahan kun dili tagda usab ang mga butang nga giganahan sa babaye nga imong naibgan.
Paminawon ‘sab nimo ang iyang mga isulti ug tagdon ang iyang opinyon. Karon kun manguyab ka na, iklaro ug isulti ang imong gibati ug ipakita nga hamtong ka na. – Tita Salie
- Latest
