May gitago ang kangitngit
Gipasabot ni police chief Dindo Raval si SPO1 Nicko Bernal kabahin sa kulto nga gituohan nila nga responsable pagpatay sa tulo na ka bata sa lungsod sa Tinago.
“Ang Bangkulis Black Brotherhood usa ka kulto nga nagsugod didto sa India. Karon nakasulod na diay ang maong kulto sa Pilipinas ug ania na gani sa Tinago.”
“Pero unsa may labot niana, sir sa kamatayon sa tulo ka bata?” ni Nicko nga wala makaagpas sa teyoriya sa hepe.
“Paminaw. Dinhi niini’ng maong libro, akong nabasa nga usa sa doktrina nga gisulod sa Bangkulis Black Brotherhood mao ang pagpatay sa tanang mga bata’ng babaye nga natawo sa Septiyembre 8,” sa hepe pa.
Nakugang si Nicko sa iyang nasayran. “Kagabii gibasa g’yud nako’g maayo kining libro ug akong nasayran ang ilang mga doktrina,” dugang ni Chief Inspector Raval.
“Pero sa unsa man nga katarongan nga ilang patyon ang batang babaye nga natawo sa Septiyembre 8 sir?” ni Nicko.
“Tungod kay nagtuo sila nga magpakatawo pag-usab si Birhen Maria nga maoy inahan ni Jesucristo. Nagtuo usab sila nga magpakatawo pag-usab si Jesus apan aron mahitabo kana, kinahanglan magpakatawo pag-usab si Maria aron adunay manginahan ni Jesus sa ikaduhang higayon.” (Sumpayan)
- Latest
