Ang bahandi ni Abram

Daghang nahibulong sa kalit nga pagkadato ni Abram kay wala man siya’y klaro nga panginabuhi. Sugo-sugoon lang gud kini sa mga silingan aron makakuwarta.

Ang gipuy-an nga balay ni Abram gubaon ug nagbahirig duol sa pangpang. Patay na ang iyang mga ginikanan ug nag-edad pa og singko anyos si Abram pagkamatay sa iyang ginikanan.

Karon nga ulitawo na si Abram, duna’y makakita kaniya nga mogawas sa iyang payag ug adto mohigda ilawom sa nangka hangtud na sa kabuntagon.

Mosaka lang si Abram sa iyang payag kun mag-uwan.Dayon, daghan ang nahibulong kay wala na nila makita pa si Abram. May nag-ingon nga mibalhin na kini pagpuyo sa isla.

Apan duna’y nagtuo nga basin og gidala si Abram sa nagpuyo sa nangka.

Ang bugal-bugalon nga si Onofre miingon “Kadto si Abram maong wala na to dinhi sa ato kay nagtaban to’g babaye. Ang babaye nga iyang gitaban sama gud niya, pobre ug kakha-tuka pud.”

Apan paglabay sa unom ka bulan kalit lang mitumaw si Abram ug dili na kini lago og pamiste. Mahalon na ang iyang mga sinena. Ang nakapasamot g’yud sa kahibulong sa mga silingan kay naninda na si Abram og mga pagkaon ug paglabay sa pipila ka bulan nakapatukod dayon siya og balay sa napalit niya nga yuta.

Manggihatagon si Abram ug matinabangon kun aduna’y mangayo og tabang. Miabot ang adlaw nga magminyo na si Abram ug ang suwerteng babaye mao si Imak, ang dalaga nga anak nilang Tibong ug Calixta. “Ngano nga dato ka na man kaayo ron, Abram?” nangutana si Imak nga karon iya na’ng asawa.

“Imak, kay asawa na man tika, tug-anan tika nga ang nakapadato nako mao si Agihor, ang dato nga agta nga nagpuyo sa karaang nangka kay gihatagan ko niya’g mga bulawan.

“Dato nga agta?” ni Imak. “O, aron ka g’yud makatuo, ugma sa gabii dad-on ko ikaw didto sa langob diin aduna’y daghang bulawan,” hinay ang tingog ni Abram.

Unya usa kadto ka mingaw nga gabii may nakakita ni Agihor nga nagtuk-ong sa tugkaran sa dako’ng balay ni Abram. Dako ug itom nga tawo ang ilang nakita nga nagpabuhotbuhot sa iyang tinustos.

Ug milanog ang tingog ni Agihor ug kini nadungog sa mga silingan nga nagkanayon. “Ang karaang nangka sa may pangpang korala kini kay dunay nagplano nga ila kining ipaputol aron ang punoan himoong gitara!” Mitubag dayon si Abram. “Oo, higala, ugma libotan ko og habog nga koral ang karaang nangka nga imong pinuy-anan!” (Kataposan)