Tindahan og kandado

Kasagaran sa mga abogado nga bag-o lang nipasar sa Bar exams, manglaban nga wa’y bayad sa serbisyo aron lang makakuha sila og kasinatian.

Ang uban manarbaho sa mga inila nga law office. May mangempleyo ‘sab sa mga buhatan nga pribado ug sa gobiyerno.

Lahi si Atty. Tony Icos. Dili siya gusto nga mangempleyo. Gusto siya nga wa’y amo. Kun mekaniko pa siya, mag-abli g’yud siya og kaugalingong talyer.

Busa, nihangyo siya sa iyang higala nga aduna’y karenderya. Gipagamit siya’g usa ka lamesa sa karenderya.

Dunay nagpalaban niya nga higala sa tag-iya sa karenderya. Gikiha og pangawat. Tag-iya og tindahan sa kandado ang nikiha sa akusado.

Nitambong dayon si Tony sa arraignment (pagbasa sa kiha) sa iyang una nga kliyente nga si Nilo Dacol. Sa pagbasa sa kiha, nadungog ni Tony ang mga lainlaing brand sa kandado nga nangawala.

“Unsa man nga hitaboa? Nga nakiha ka man og pangawat og mga kandado?” ni Tony ngadto sa iyang kliyente paghuman og basa sa kaso.

“Nakalimtan pagkandado sa tag-iya ang iyang tindahan,” ni Nilo. Nakapanglingo si Tony nga kakataw-onon.

“Tindahan og kandado, wa makapangandado? Nakawatan hinoon og mga kandado? Pagkadaku’ng balisong!” tuaw ni Tony sa hilom. (Kataposan)