Halandumon nga Sugat

Gula 4

Nahibulong si Gerald kun ngano nga nag-inusara ra man si Daisy nga misaksi sa mabulokong Sugat sa Pagkabanhaw sa Minglanilla.

“Ngano’ng wala ka may kauban Daisy?” wala gayud makapugong si Gerald ug gipangutana niya ang dalaga ngano’ng nag-inusara ra man kini. Diha pa niya masayri nga susama diay ang ilang sitwasyon.

Taga lungsod sa Borbon si Daisy ug mibakasyon lang sa balay sa iyang uyoan sa dakbayan sa Talisay. “Kun mao, pareho diay kita nga mga probinsyano ug probinsyana,” ni Gerald nga nagpahiyom.

“Apan bisan og probinsyana kini si Daisy gaw Gerald, apan dili mailhan kay maayo kaayo mamiste,” matud ni Ruben nga ig-agaw ni Gerald. Human sila makapainit, giagni ni Gerald si Daisy nga mamiya na sila gikan sa painitan kay maikog sila sa ubang mga mopainit nga dili makalingkod.

Didto sila mipaingon sa kilid sa simbahan. Dili na kaayo daghang tawo sa palibot sa simbahan ug hapit na mosidlak ang adlaw. Nakita na g’yud ni Gerald ang katahom ni Daisy ug wala siya masayop sa pagtanyag niini og tabang nga makatan-aw ang dalaga sa sugat.

“Bilib g’yud ko nimo gaw, taga probinsya ka apan abtik kaayo ka nga nakakita og amiga,” nangomedya si Ruben sa ig-agaw.

Gipangutana ni Ruben si Daisy kun kanus-a kini mopauli sa ilang dapit sa Borbon.

“Next week pa tingali ko mopauli kay aron makasuroy-suroy g’yud ko dinhi sa siyudad,” matud ni Daisy. “Suheto ka na ba sa dakbayan sa Sugbo?” gisukna ni Gerald ang dalaga.” Milingo-lingo ang dalaga.

“Kun mao, mas maayo tingali nga magkuyog-kuyog ta sa pagsuroy-suroy kay pareho man ta nga wala kaayo masuheto dinhi sa siyudad,” ni Gerald. (Sumpayan)