Siya ug ako sa kangitngit

Gula 39

Ang kuwarto ni Venus nahimutang sa ikaduha gikan sa banyo. Hamugaway ang maong lawak bisan pa’g tulo ka tawo ang magpuyo. Pero duha ra ang katre sa maong lawak.

Dili kuno gusto ang tag-iya nga ma-crowded ang kuwarto aron wala’y samok. Duha ra g’yud ka tawo ang pasudlon mata’g kuwarto.

“Imo na’ng katreha,” gitudlo ni Venus ang bakante’ng katre. Kuhaa lang na’ng pipila nako ka gamit nga gibutang diha. Adto lang ipatong sa lamesa.”

“Pila’y abang nimo niini’ng kuwartoha Venus?” gipangutana ko siya.

“Barato ra, P1,000 ra ang buwan. Libre ang tubig ug kuryente,” niya pa.

“Maayo kay barato ra man diay,” matud ko. “Pila ra ‘sab gud tawon ang akong suweldo,” abtik nga tubag ni Venus.

“Sagdi lang. Magtunga lang unya ta sa balayranan ni’ng kuwartoha,” ako siya nga giingnan.

“Ayaw na paghuna-huna bahin niana, Monica. Pangandam hinuon sa imong kaugalingon,” giingnan ko ni Venus nga nakapakurat nako.

“Ipaila ko ikaw sa tag-iya sa balay aron sila masayod nga anhi ka na mopuyo tipon nako,” matud sa akong amiga.

Nanihapon una mi sa gawas. Pagbalik namo sa balay, gipaila nako ni Venus ngadto sa magtiayon nga Hugo ug Sesing Rehaz nga maoy tag-iya sa balay nga among gipuy-an. Gipahibalo sila ni Venus nga motipon ko niya’g puyo sa kuwarto. Walay pagsupak ang tag-iya sa balay. (Sumpayan)