Pagpamalandong

Human sa buntagong misa nga natapos sa alas-9, gaan ang mga lakang ni Arman nga misulod sa prayer room sa Cathedral. Human makalingkod sa bakanteng lingkuranan, miluhod si Arman ug nanguros. Buot siya nga mohimo og pagpamalandong sa iyang kaugalingon, ilabi na nga nagsugod na ang pag-obserbar sa lenten season o ang panahon sa kuwaresma.

Pinaagi sa pagpamalandong ning buntaga, buot tugkaron ni Arman kun asa na gayud siyang dapita diha sa iyang pagpakighiusa sa atong Ginoo, ilabi na nga nahisakop na siya sa usa ka relihiyusong kapunongan dinhi sa siyudad sa Sugbo, uban sa iyang asawang si Naty ug tulo ka  anak.

“Ipaubos ang imong garbo, Arman, uy! Di man ka gusto nga korehian ka sa imong mga sayop...!” badlong ni Naty nga miiknat ang kilay.

“Kadaling mangluod ining Arman, uy....!” laing kumento sa kauban ni Arman sa relihiyusong kapunongan.

“Hay, kining akong bana....!” laing reklamo ni Naty kang Arman. “Hanas na kaayong molitok sa pulong sa Ginoo! Apan igo lang sa pulong, wa sa buhat...!”

“Trying hard ning Arman, uy!” hilom nga dayeg-saway sa kaubanan ni Arman sa relihiyusong kapunongan.

Sa sulod sa prayer room, kinasingkasing ang pagpamalandong ni Arman samtang padayon nga nagluhod. Gipangayo niya karon sa Ginoo nga malamdagan ang iyang kaugalingon, nga magiyahan siya sa Balaang Espiritu, aron makorehian ang iyang kasaypanan ug mahulipan ang dako pa niyang kakulangan aron mahimong maayong tinun-an sa atong Ginoo.

“Ning kasaulogan sa kuwaresma, lamdagi ko,o, Ginoo, kun unsa gayud ang akong mga sayop, ang akong dakong kakulangan diha sa pagpakighiusa ko kanimo...!”

“Unya, daw may nabating gamhanang pulong si Arman sulod sa prayer room nga nanaginting sa iyang kaisipan, samtang padayon siyang nagluhod.

“Ipaubos ang taas mong garbo! Puy-i ang akong pulong sa imong kasingkasing ug ayaw pagpakaaron-ingnon! Nunti sa buhat ug dili sa pulong lamang! Papasa ang sobrang bilib sa imong kaugalingon! Dawata ang koreksyon sa imong mga sayop...!”

Migula si Arman sa prayer room. Misugat kaniya ang nagpamahit nga kainit sa nagsugod na nga kuwaresma sa gawas sa simbahan. Apan migaan ang iyang pamatyag sa lawas, human gitubag sa Ginoo ang iyang pagpamalandong ning buntaga. (Kataposan)