May luha ang kalipay
Adlaw sa gradwasyon. Andam na si Joshua alang sa ilang gradwasyon nga gikatakda sa alas tres sa hapon. Nagpaabot siya sa iyang ginikanan nga wala pa mahuman sa pag-ilis. Sa gawas sa ilang payag nahimuot siyang nagsud-ong sa mga pinalihog sa iyang ginikanan.
May naghiwa sa mga lamas, naglapa sa karneng baboy ug kanding. Ug labaw sa tanan niyang gikahimut-an ang nagtuyok sa litsong baboy nga gitagana sa iyang Tatay Victor alang sa iyang gradwasyon.
Sa pagsud-ong ni Joshua sa mga pinalihog mibiya ang iyang hunahuna ug mipasundayag ang mapait niyang kagahapon.
“Sayang ang barug, hawod, pero panagat ang dangatan,” padungog sa bugalbugalon niyang mga klasmet.
“Siguro manedyer sa panagat,” hirit sa uban niyang kaubang bugalbugalon.
Wa hatagi’g bili ni Joshua ang yagayaga niyang madungog sa iyang mga klasmet. Tinuod man nga mananagat ang iyang amahan. Kabuhian sa mga lumolupyo sa barangay Locon. Mao nga sa Xavier College ubos ang pagtan-aw sa iyang mga kauban sa klase. Bisan ang mga tsiks naglikay niya tungod sa pagtuo nga dagat ray ilang dangatan uban ni Joshua.
“Ako diay nga ipahibalo nga si Joshua Real, maoy Summa Cum Laude sa College of Engineering!” pulong ni Mr. Vingie Fajardo ang Dean sa College of Mechanical Engineering sa Xavier College. Kaging ang tanang klasmet ni Joshua sa ilang nadungog gikan ni Mr. Fajardo. Wa kapugngi ni Joshua ang kalipay. Nakahilak siya nga naabtan pa sa iyang ginikanan nga andam na sa ilang lakaw pagtambong sa gradwasyon.
“Ayaw paghilak, Dong Joshua, angay kang magmaya. Nakatapos ka na sa imong gitinguha ug nakuha mo ang labing dakong pasidungog,” ni Mama Gina niya.
“Luha kini sa kalipay, Mama Gina, kay dili na nako madungog ang yagayaga sa akong mga klasmet. Ug labaw sa tanan gibaslan ko ang inyong kahago!” ni Joshua. (Kataposan)
- Latest
