Kalipay matag adlaw

Dear Tita Salie,

Kada adlaw g’yud ko mopalit og Banat News kay malipay ko mobasa niini matag adlaw. Tita Salie, sukad sa akong pagkabata nga duna na ko’y buot ug hangtud karon nga 30 years old na ko, daghan g’yud ko’g naagi-an nga mga pag-antos sa kinabuhi labina ang kapobre. Ngano’ng aduna may pag-antos? Kinsay responsable niini? Unta imo ni’ng matubag.

* * *

 Maayo’ng adlaw kanimo,

Ang pag-antos usahay mahitabo tungod ra usab sa tawo. Apan gipakita sa kasaysayan nga ang pipila ka tawo nga nakahimo’g maayo’ng mga buhat mao kadto’ng nakasinati og grabe’ng pag-antos. Ug ang daotang mga tawo nga makainpluwensiya sa uban magpadayon ang ilang pag-antos. Apan sa orihinal, dili ang tawo ang nag-una nga hinungdan sa pag-antos. Si Satanas nga yawa, nga kaniadto alagad sa Diyos wala mubaro’g nga lig-on diha sa kamatuoran ug mirebelde sa Diyos. Ug karon ania siya sa yuta ug sumala sa Pinadayag 12:12 kini nag-ingon: “Alaot ang yuta ug ang dagat tungod kay ang yawa nanaog kaninyo nga may dako’ng kasuko, kay nahibalo nga hamubo na lang ang iyang panahon.”

Ug ang grabeng kalisod karon nagtuman lang sa tagna ni Ginoong Jesus sa Mateo 24:7, 8 “Ang nasud motindog batok nasud, ug aduna unya’y kanihit sa pagkaon, ug mga linog sa nagkalainlaing dapit. Kini’ng tanan maoy sinugdanan sa mga kasakit.”

-- Tita Salie