Utok-bulinaw

Nakapanglingo si Edgar nga naglantaw kang Mario nga mipaso na sa bantawan human matawag ang iyang ngalan, isip usa sa migraduwar sa kurso’ng Architecture. Parehas sila si Edgar ug Mario nga taga siyudad sa Dipolog ug ania dinhi sa siyudad sa Sugbo mopadayon og eskuyla sa kolehiyo sa usa ka mga inilang unibersidad.

Managlahi ang unibersidad nga ilang gieskuylahan, apan parehas sila og boarding house nga gi-estaran. Mechanical engineering ang kursong gikuha ni Edgar.

“Sus, maayo pa ang utok-bulinaw, migradwar na sa kursong Architecture!” nagkitabkitab ang baba ni Edgar nga padayong naglantaw kang Mario. Mura’g gibati’g kaulaw si Edgar sa kaugalingon nga mao untay nahimong balediktoryan sa paggradwar nila ni Mario sa hayiskol didto sa Dipolog City tungod kay managklasmeyt sila gikan sa first year ug hangtod na sa 4th year high school, apan wala hinuon siya makagradwar sa iyang kurso ning tuiga.

“Utok-bulinaw...!” mao kini ang itawag sa ilang mga klasmeyt ngadto ni Mario sa hayiskol, tungod kay bulok, bugo ug bala kaayo si Mario sa klase. Nakapasar man tuod si Mario sa hayiskol, apan kinaluoy lang sa ilang adviser.

Apan ambot sab nga pagkaunsaa nga nataymingan man nga nakapasar sa entrance test si Mario sa unibersidad dinhi sa  siyudad sa Sugbo aron makakuha og kursong Architecture. Si Edgar maoy giilang lantip og pangisip sa tanang graduating students ug nahimo gyud nga balediktoryan sa hayiskol.

Sa pag-eskuyla na nila ni Edgar ug Mario dinhi sa siyudad sa Sugbo kanunay magpatudlo ang naulahi kaniya sa ubang subjects. Bisan utok-bulinaw si Mario apan kugihan ug pokus kaayo kining magtuon sa tanang leksyon sa iyang mga subjects.

Sa sinugdan, namentin gyud ni Edgar ang iyang full-scholarship sa unibersidad nga iyang gieskuylahan. Apan sa pagtungtong na niya sa 4th year college  uban sa iyang kursong Mechanical Engineering, nabuang siya sa pagpakigbarkada ug panguyab og mga babaye.

Daghang higayon nga wala na siya’y sulod-sulod sa iyang klase. Ang binulang alawans nga ipadala sa iyang mga ginikanan, giwaldas paggasto ni Edgar sa iyang uyab ug barkada. Daghan siya’g mga hagbong nga subjects, maoy hinungdan nga wala siya makagraduwar sa iyang kurso. Hinay’ng mibiya si Edgar sa dasok nga mga tawong mitambong sa seremonyas sa graduwasyon. Dili siya makatuman sa sugyot ni Mario kaniya nga patauron siya’g buoquet niini. Daw maulaw siya sa kaugalingon nga ang gianggaan og utok-bulinaw niyang higala malampuson hinuong nakagradwar sa iyang kurso sa kolehiyo. (Kataposan)