Amang nga mangtas gikahadlokan

Dali ra kaayong mikatay ang tabitabi bahin ni Isyong nga kini siya usa ka mangtas nga ungo ug maoy nagbalbal sa asawa ni Rufo, ang barangay tanod nga sakop ni kapitan Binok.

Luoy kaayo ang pagkamatay sa asawa ni Rufo kay hasta ang parte sa iyang ginhawaan gikuniskunis gyud pag-ayo sa maong mangtas ug labihan intawon nakaminatay’g hilak ni Rufo sa gidangatan sa iyang mahal nga kapikas nga si Menciang.

Mingaw man unta ang situwasyon sa mga lumolupyo dinhi sa sityo Itig Uwak apan kalit lang nga nahimong samok tungod ning usa ka mangtas nga ungo nga nagsige lang og pamalbal dinhi sa sityo ug ingon man sa tibuok balangay. “May adlaw ra nako kanang maong mangtas, bay Tinong,” ni Rufo pa ngadto sa iyang kaubang tanod. “Tagudtagoron gyud nako ang tibuok niyang kalawasan ug unya akong dauban.”

“Mao gyud nay angay natong buhaton, bay Rufo,” hinay’ng tubag ni Tinong. “Bay, bay Rufo nakadungog ka sa tabitabi nga kana kuno si Isyong mao na ang mangtas kay maoy gibinlan sa pagka ungo sa namatay’ng amahan nga si Ananas. Hilabihan baya to ka mangtas ni Ananas ug didto ra kuno mamatay sa isla Litob kay napusilan.”

“Mao nay akong sutaon, bay Tinong. Kun mamatud-an nako nga siya gyud ang mangtas, aw, impas nang amanga na,” mikagot ang mga ngipon ni Rufo nga namulong.

Tuod, usa ka gabii dihang nagpatrolya sila si Rufo ug Tinong libot sa tibuok balangay may nadunggan silang singgit sa pakitabang.

‘Tabanggggg! Tabanggg tawon mo, mga silingan kay ang akong asawa gibugno sa dakong iro! Tabanggg mooo!” lanog kaayo kining maong singgit sa pakitabang nga mura’g naa lang sa may sityo Itig Uwak. Midali dayon sila’g dagan si Rufo ug Tinong aron pagsusi sa nangayog pakitabang ug aron usab pagdakop sa maong mangtas.

Pag-abot nila sa may balay sa nangayo’g pakitabang maoy ilang nakita si Hulyo mamalitay’g botelya nga nagsinggit gihapon. Ug maoy nakita nilang Rufo ang usa ka dakong iro nga mipaakpaak sa asawa ni Hulyo nga wala nay kinabuhi. Bangg! Banggg banggg! Tulo ka buto gikan sa pistola nga kalibre.38 ni Rufo ug Tinong. Didto kini modagan paingon sa payag ni Isyong ug didto ilang nakita si Isyong amang nga nagbarog nga nagtapion sa iyang tangkugo. Nagsinyas sinyas pa ang amang.

“Ikaw diay ang mangtas nga ungo, Isyong, hayop ka. Angay kang mamatay!” Gitumong ni Rufo ang iyang pistola ngadtong Isyong apan kalit lang kining milukso ug nahanaw pagkalit tipon sa kangitngit sa kagabhion.

Pagka-ugma wala na si Isyong sa iyang payag. Ug may nakakita nga si Isyong tua kuno sa isla Litob ug nagnegosyo’g amahong ug daghan na kaayong suki ang amang. Dinhi nakahukom si Rufo nga iyang apason si Isyong amang nga mao ang mangtas nga ungo dinhi sa ilang sityo Itig Uwak ug adto niya todasa. (Kataposan)