Panumpa nga bakak - Gula 30
Dugay-dugay g’yud nga namalik ang mga barkada ni Janeth nga nanuroy sa baybayon mao nga nagtagbaw gayud sila si Jeffrey ug ang dalaga sa ilang pagparayganay didto sa kayda sa giestahan nila nga cottage.
Kaadlawon na sila nga namauli. Gipanghatud ni Jeffrey ang mga barkada ni Janeth sa tagsa-tagsa nila ka dapit nga gipuy-an ug kataposan niya nga gihatud ang dalaga.
“Good morning Jeff,” matud ni Janeth sa wala pa kini manaog sa gisakyan nila nga Mitsubishi Strada. “Unsa’ng orasa tika kuhaon unya alang sa atong pagpanuroy?” gisukna ni Jeffrey ang iyang girlfriend.
Giingnan si Jeffrey ni Janeth nga sa hapon na lang sila magdeyt aron makapahuway sila kay lapoy ang ilang lawas gikan nga nag-night swimming. Gidala na lang ni Jeffrey ang sakyanan sa ilang balay kay kaadlawon pa.
Bisan og lapoy ang kalawasan ni Jeffrey apan wala dayon siya makatulog. Malipayon niya nga gihandom ang kaagi nila ni Janeth gikan sa sulagma nila nga panagkaila ug hangtud karon.
Ingon sa dili g’yud makatuo si Jeffrey nga sa kahamubo lang nga panahon nahimo na niya’ng girlfriend si Janeth. Paraygon usab kaayo si Janeth ngadto kaniya mao nga diha sa huna-huna ni Jeffrey nga mao kini ang himuon niya’ng kapikas sa kinabuhi. Takulahaw lang nga nakatulog si Jeffrey. Alas tres na sa hapon siya mahigmata ug misantop dayon sa iyang huna-huna ang ilang panagdeyt ni Janeth. Nagdali-dali siya’g andam, naligo, nag-ilis.
Apan nahinumdom si Jeffrey nga wala siya makapananghid nga huwaman niya ang sakyanan hangtud karong adlawa. Naghinuktok si Jeffrey. Giteksan niya ang iyang amigo ug gihangyo nga ugma na lang iuli ang gihuwaman nga sakyanan. (Sumpayan)
- Latest
