Panumpa nga bakak

Gula 19

Tugob sa kamalipayon ang pag-night swimming nila ni Jeffrey ug Janeth, ingon man sa tulo ka laing paresan sa mga barkada sa dalaga.

Nahuna-huna ni Jeffrey nga kun sila pa lang duha si Janet ang nag-night swimming niadtong higayuna, sigurado g’yud nga may nahitabo na kanila’ng duha. Nasabot ni Jeffrey nga gibati usab ni Janet ang tumang kahinam diha’ng gigakos niya pag-ayo ang dalaga ug gihapohap ang kalawasan niini samtang pareho sila nga gihabolan sa tubig sa dagat.

Sadya kaayo ang grupo nga nagkumbati pagkaon sa litson nga pinalit ni Jeffrey. Bisan og nangaon na sila, misikit gihapon kang Jeffrey si Janet ug sila na lang gani ang gikalingawan og komedya sa mga barkada sa dalaga.

Wala na’y tago-tago ang ilang relasyon ngadto sa mga barkada ni Janeth. Sa hilom gibati og dakong kalipay si Jeffrey nga naangkon niya ang gugma ni Janeth.

Wala kahinugni ni Jeffrey ang iyang daku-dako nga nagasto pagpalit og litson ug ang gasto unya sa gasolina nga ilang makunsumo sa paggamit nila sa sakyanan nga gipahuwam sa iyang higala.

Human nila og pangaon, nanuroy ang mga kauban nila ni Jeffrey ug Janeth. Naglakaw-lakaw sila sa baybayon sa unahan. Dinhi nakalugar na usab sila si Janeth ug Jeffrey sa pagparayganay didto sa cottage.

Gipawong ni Jeffrey ang suga sa sulod sa cottage ug ang naghatag og dan-ag kanila mao na lang ang suga sa daplin sa baybayon. Sa makausa pa nanginit ang ilang kalawasan sa walay pugong-pugong nga pagparayganay.

 “Maayo ka man diay kaayo modala’g pagilok Jeff. Husto na uy, basin dili na unya kita makapugong,” nakatuaw si Janeth diha nga milunga si Jeffrey sa pagparayeg sa dalaga. “Bitaw, ugma ha, manuroy ta,” matud ni Jeffrey. (Sumpayan)