Ning adlaw sa akong graduwasyon

Ning adlaw sa akong graduwasyon karon sa hayiskol, nagsagol ang gibati nga mikuyanap sa akong galamhan. Gibati ko’g kalipay nga sa kataposan, mograduwar na gyud ko sa 4th year high school sa akong Alma Mater, ang Tabogon Roosevelt High School (TRHS).

Mibati ko’g kalipay nga nahimo akong valedictorian sa tibuok graduating class ug segurado nang makapadayon ko’g eskuyla sa kolehiyo, kay makapahimulos man ko’g full scholarship sa akong pagka-valedictorian.

Apan sa laing bahin, mibati sab ko’g kamingaw. Oo, tumang kamingaw nga maghunahuna, nga kaming tanang mga klasmeyt, magkatibulaa’g na puhon inigpadayon na namo’g eskuyla sa kolehiyo. Kay alang kanako, way sama kasadya panahon sa high school days. Lalim bay espuko, nga upat ka tuig nga nagkauban kaming mga klasmeyt sa hayiskol, nga nahimong suod na sa akong dughan uban sa among mga maestro ug maestra.

“Kun mahimong ikabalik pa lang ang malipayong mga adlaw panahon sa hayiskol...!” mao kini ang kanunay’ng gihunghong sa nagpanghawid kong kaisipan.

Ug samot na gayud nga bation ko’g kamingaw sa labing suod ko sa dughan nga giisip kong akong inspirasyon, ang babaye nga maoy unang nakapapitik sa akong kasingkasing ug matuod nga gugma, ang akong klasmeyt nga maoy first love ko ug maoy nahimo kong salutatorian si Luzviminda!

Nasayod ko nga sa among edad nga 15, parehas mi’g gibati si Luzviminda. Yes, first love! Ug nakapadayag gyud ko sa akong gugma niya, atol sa among “Juniors & Seniors Prom”.

Apan wa na nako masundi sa pagsanong aron sa pagklaro sa matuod namong relasyon. Apan ang among pahiyom, pasiklap, magkatagbong tinan-awan ug sa sobrang close namong duha, igo na kaayo nga sabton nga parehas ming nahigugma sa usa’g-usa.

Mao lagi, nga ning adlaw karon sa akong graduwasyon sa hayiskol, duha ka matang sa pagbati ang klarong gipitik sa akong kasingkasing.

Una, kalipay nga makagraduwar na gayud sa hayiskol. Ikaduha, ang kamingaw sa akong mga klasmeyt nga magkatibulaag na inig-eskuyla sa kolehiyo ug ang labihang kamingaw sa babayeng first love ko, nga wa pay kaseguroan kun magkadayon ba kaha ang duha namo ka gugma sa umaabot nga katuigan.

Ug atol ning akong graduwasyon karon, madasigon kong isinggit sa pag-ingon! “Mabuhi ang tanang mogradwar sa hayiskol ning tuiga...!” (Kataposan)