Panumpa nga bakak - Gula 14
Diha’ng nag-ukang na sila si Jeffrey ug Janeth sa paghagkanay sulod sa cottage, giagda na sa dalaga si Jeffrey nga mangaligo na sila.
“Wala lagi ko’y extra nga sapot, ilabi na g’yud ang brief,” gipasabot ni Jeffrey si Janeth. Apan mapugsanon ang dalaga nga pakaliguon g’yud niya ang iyang boyfriend.
“Pasagdi lang gud, pag-brief na lang. Dali ra bitaw na nga mauga kun magtapis ka’g tualya inigkawas nimo sa dagat unya,” matud ni Janeth nga nagpahiyom.
Wala gayud makabalibad si Jeffrey. “Sige ha? Apas namo sa dagat?” giingnan ni Janeth si Jeffrey sa dayon niya’ng gawas sa cottage. Mipaingon si Janeth sa iyang mga kauban nga didto na sa dagat.
Mihugyaw ang mga classmate ni Janeth diha’ng miipon na siya sa grupo. “Day, bongga ka man diay kaayo og boyfriend, de-sakyanan pa ug tingali kuwartahan g’yud na kay mi-donate gud og litson sa atong pangaligo,” matud sa usa ka classmate ni Janeth.
Gitug-anan ni Janeth ang iyang mga classmate nga dili unta ganahan nga maligo si Jeffrey kay wala kini makadala og extra nga sinena. “Ako lang giingnan nga mag-brief na lang siya sa pagkaligo. Ayaw ninyo kataw-i ha?” gibauran ni Janeth ang mga barkada.
Tuod, nalantawan na nila nga migawas na si Jeffrey sa cottage nga nagsul-ob lang og brief. “Jeff, dali na!” gisinggitan ni Janeth ang iyang boyfriend.
Midagan si Jeffrey ug mideritso og lingkod sa dagat aron dili makita ang mihulma niya nga pagka lalaki. (Sumpayan)
- Latest
