Tay, ania ang akong diploma

Human sa gipahigayong seremonyas sa gradwasyon sa tanang migradwar sa hayiskol niadtong udtoha, mahinangpon nga giduol ni Elden ang iyang Tatay Elmo nga naghulat kaniya uban sa dasok nga mitambong sa adlaw sa gradwasyon sa tanang 4th year high school nga mga estudyante.

Angayan kaayo si Elden sa gisul-ob niyang puti nga pulong mubog-bukton, giparesan sa iyang slaks itom nga karsones ug itom nga panit sapatos. Ang tanan niyang gisul-ob karon napalit nila sa iyang Tatay sa ukay-ukay.

Gituyo nga ang tanang mogradwar sa hayiskol dili na lang pasul-obon og toga. Ang mga babayeng migradwar, gipasul-ob na lang usab sa naandan nilang unipormeng blawos ug sayal. “Tay, ania ang akong diploma...!” mapahiyumon si Elden nga mitunol sa linikit niyang diploma ngadto sa iyang Tatay Elmo nga malipayon usab nga midawat niini.

“Hay, salamat gyud sa Ginoo, Elden, nga bisan nabuhi ta’s pamasura adlaw-adlaw, bisan nagdako ka nga way inahan nga nag-amuma, apan nakagradwar na gyud ka’s hayiskol...!” “Oo, Tay! Ang akong diploma karon, akong ihalad nimo! Sa imong pagmatuto nako, Tay! Sa imong lahutay, nga bisan tuod basurero lang ta, apan nakalampos gihapon ko pagradwar sa publikong hayiskol nga eskuylahan!” “Sige, Elden! Maniudto ta! Bangkahan tika’g paniudto anak! Anha lang gud ta sa pungko-pungko nga kan-anan! Duna pa koy sobrang kuwarta!”

Gipaundayonan ni Elden ang iyang Tatay Elmo. Nakadayeg gyud siya sa iyang amahang kabos. Bisan nabuhi silang duha sa pamasura matag adlaw ug bisan wa siya’y namat-an nga inahan, kay matud pa sa iyang Tatay, namatay ang iyang inahan sa pagkahimugso niya kay naputlan sa lumawig, apan nakadayeg gayud siya sa iyang amahan sa pagkakugihan nga mamasura uban sa badibading karomata. Mao usab kini ang hinungdan nga miabag gayud si Elden sa iyang Tatay sa pagpamasura, sa pagdusoduso sa ilang karomata ilabi na sa mga adlaw nga way klase ang eskuylahan. Nakalahutay gayud sila ug nakagdradwar gayud siya karon sa hayiskol.

Sa pungko-pungkong kan-anan daplin sa aseras, malipayon nga nagsalo sa pagkaon ang amahan ug anak nga basurero. “Tay Elmo, ayaw lang kabalaka. Makapadayon ra gihapon ko’g eskuyla sa kolehiyo. Mi-aplay kong usa ka working scholar sa usa ka unibersidad nga gibak-apan sa akong adviser nga maestro sa hayiskol ug nadawat na ko....!” “Paningkamot gyud, Elden! Ang imong diploma karon maoy naghatag nako og garbo ug kadasig aron padayong makalahutay pagsuporta nimo bisan pinaagi man sa pagpamasura lang...!”

Ug nag-apiray sa ilang mga kamot ang amahan ug anak nga basurero. (Kataposan)