Paremedyoha ko day Isyat

Ang pulong remedyo paagi kini aron makalikay ka sa pagpangamote, laing pulong kini sa pagpanghulam kay naapiki. Remedyo sa magtiayon.

‘Paremedyoha ko diha og sinsiyo day para pamlete’, ni Dong Onyot pa nga nangindahay sa kapikas.

“Sus baya ka Onyot, kanus-a pa man intawon ka makakita og tibuok oi. Sige ka ra man gud og daginot og sinsiyo,” paraygong tubag ni Cutie.

Remedyo sa abtik sa kadalanan.

‘Porbida baya ning panahona, wala gyuy maremedyo bisan pitaka lang unta,” ni Isyot Mangunguot pa. Taudtaod nang nagburdoburdo si Isyot sa dalan Colon, apan wala gyud siya’y nadaginot. Mingaw ang panahon, krisis  kaayo sa bulsa tan-awon ang mga lumalabay nga tukbonon sa kasiaw ni Isyot sa panguot.

Remedyo ubos sa kidlapkidlap sa kabaret...

‘Ah patuga ka pa man Noy Syakoy, gadako lang nang pabawnan mo! Unsa man nang imo hinigta’g lanot? singgaak ni Isyat sa kabaret.

‘Pasensiya na Day Isyat, nakuotan man gud ko. Wala ko’y mapalit nga mainom nimo ron. Hala, paremedyoha hinuon ko diha aron malingaw ta,’ tubag ni Noy Syakoy.

‘Unswaa! Kabastos ba nimo! Nakalitan si Isyat.

‘Remedyo ba, ilista lang sa akong bayranan. Ako lang balikon ha. Mahimo Isyat?’ ni Noy Syakoy nga nagpanilap sa hiniwa nga sumsoman ug sa bugnawong beer sa counter sa kabaret. (Katapusan)