Ang alibangbang itom

Nisaad si Roy nga pakamatyan ang maong gugma sa dalaga nga si Merla.  Tungod kay sunod semana molarga siya sa laing nasud sa Australia. Ug usa siya ka enhenyero. Unya inig pauli mangasawa dayon. Gigunitan pag-ayo ni Roy ang kamot sa dalaga.

“Merla, ayaw kabalaka kay akong ipasalig nga panggaon ko ikaw,” ni Roy. “Timaan niana dawata kining singsing nga maoy atong handumanan sa gugma...”

“Salamat kaayo ining singsing nga imong gihatag. Ako kining ampingan sama sa pag-amping ko sa atong gugma...”

“Mao sab ang akong gibati diha nimo,” ni Roy nga nagsugod na’g dahili ang mga luha.

“Makahilak man pud ta nimo...” ni Merla.

Sa didto na si Roy sa Australia, naningkamot siya pag-ayo aron matuman ang gipangandoy nga maasawa niya si Merla. Kay usa man siya ka enhenyero nakatigom siya’g daghang kuwarta. Ug nisaad si Roy nga mangasawa ni Merla.

Pila may dagan sa mga adlaw nga nanglabay gimingaw si Merla ni Roy, kay nagpaabot nga mangasawa kaniya.

Usa ka buntag niana untop alas 8:00 wala ang iyang mga ginikanan kay tua sa lungsod namalit og mga pagkaon. Ug nilingkod sa lingkuranan nga naghinuktok.

Apan sa kalit lang sa iyang paglingkod may nabatyagan si Merla nga adunay nilingkod sa iyang duha ka paa nga wala niya makita. Pipila ka gutlo ang nilabay nawala na ang kabug-at nga iyang nasinati kaganina. Taudtaod may nanuktok sa pultahan.

“Roy, ikaw? Nganong wa ka man magpahibalo nga mouli ka?”

“Pagdali! Pahagka ug pagaksa ko...! ni Roy nga dayong lakaw.

Wala palandunga may usa ka dakong alibangbang itom nga naglupadlupad nga nisakdap sa ngabil sa dalaga. Ug nagpahilayo lang sab dayon.

Wa maglangan may niabot nga magtiayon. Ug nangita ni Merla aron sa pagpahibalo sa nahitabo ni Roy.

“Merla, ikaw ang hinigugma sa akong anak?” sa inahan ni Roy.

“Oo, ako, diri pa man to ganina, mao pa gyuy paglakaw...”

“Merla, dawata ang kamatuoran, kadtong nagpakita nimo kaganina usa nato ka kalag ni Roy. Kay sa laktod kalit siya nga giataki sa kasingkasing,” pasabot sa inahan ni Roy.

“Roy, pagka buotan mo sa pagtuman sa mga saad,” ni Merla. “Nasayod ko... nga ikaw kadto ang alibangbang itom...” (Katapusan)