Ang liso

Alegre nga nagkalingaw og hudyaka ang tulo ka manag-agaw nga sila si Nardo, Boy ug Jay. Kinaiya na sa tulo nga human og duwa adto gayud kini mag-estambay sa balkunahi sa dakong balay sa ilang apohan nga si Lolo Ismael. Milurang ang kalangas sa mga katawa nga kalit miabot si Lolo Ismael gikan kini sa iyang umahan.

“Sus! Kamong akong mga apo! Duwa ra gayud ang anaa permi sa utok! Wala pa gyud mo’y liso.” Salabtunon ang unod sa mga pulong niini, dayong lakaw sud sa balay.

“Unsaon man ang liso Lo?”

“Himuong sangod sa tari.” Tubag pa ni Nardo nga may sagol yaga-yaga ang tuno nga mibahakhak og katawa.

“Tingali og anting-anting,” salga sab ni Jay nga miuban sa kusog nga katawa ni Nardo. Pabilin nga nagpakahilom si Boy kay gibati og kalibog sa gipamulong sa apohan niini.

Human niadto milabay ang daghang katuigan sukad mamatay si lolo Ismael. Sila Nardo ug Jay tua na sa layong dapit manimuyo didto sa yutang saad sa Mindanao. Ug usa sa labing dako nga kompanya sa siyudad sa Sugbo nagtrabaho si Boy isip usa ka security guard.

Dili gayud kini sipyaton ni Boy nga mopalit og mga bag-ong hulad sa numero unong mantalaang binisaya nga mao ang Banat News, nga sarang makalingaw ug makapawala sa kalaay labi pa og oras na sa trabaho.

Wala’y trabaho karong adlawa si Boy kay day off, busa nakahigayon siya pagpauli sa ilang lugar sa probinsiya didto sa Bulungan, Toledo.

Sayo sa buntag giuban siya sa iyang Papa Mario nga suruyon ang lapad nga luna sa iyang lolo Ismael.

“Mao kini bunga sa kakugi kaniadto ni lolo Ismael nimo.” Pasabot pa sa iyang amahan.

Daghang klase sa tanom nga imong makita adunay mangga, nangka, santol ug uban pang tanom nga nagdala og makaon nga bunga. Baga sab ang kalubihan nga kakuhaan og kopras nga angkaton sa mga dagkong kompanya sa lana.

Didto na niya masabti ang dugay na nga tanghaga, para kaniya ang pulong “liso” gikan sa iyang lolo Ismael nga ang liso kaniadto usa na ka mga dagkong kahoy karon ug aduna na sab kini kaugalingong mga liso. (Katapusan)