Tim-os nga pagbati

Gula 11

Napasiga ang mga mata ni Evelyn pagkadungog niya nga siya diay ang babaye nga gipasabot ni Loreto nga iyang nagustohan ug giplanohan nga dad-on sa altar sa kaminyuon.

Nahimo’ng amang si Evelyn ilabi na diha nga gigunitan ni Loreto ang iyang bukton ug gitutokan pag-ayo ang iyang panagway. Wala siya’y laing nahimo gawas sa pagduko. “Unta matinuod ang imong giingon Lyn nga ang babaye nga daygan nako sa akong gugma dili unta masuko ug dili molikay kanako.”

“Nong Retz,” mao ra’y pulong nga migawas sa baba sa dalaga. “Walay problema Lyn, ayaw lang pugsa ang imong kaugalingon. Igo lang ko nga mitug-an kanimo sa akong gibati nga takulahaw lang migitib pag-ayo diha’ng giatiman mo ako dihang gihilantan ko,” matud ni Loreto.

Gibuhian ni Loreto ang bukton ni Evelyn ug gipunit pagbalik ang tasa nga may tunga pa sa kape. “May boyfriend ka na ba Lyn?” gisukna ni Loreto ang dalaga.

“Tinuod ang gisulti nako nga wala g’yud ko modawat og boyfriend kay gusto ko nga ikapasigarbo nimo nga mahuman ko g’yud ang akong pagtuon diin ikaw maoy migasto kanako. Wala ko masayop kay kagahapon, gipahibalo na ko nga ako ang Magna Cum Laude sa among klase. Gusto unta nako nga isurpresa kanimo Nong Retz ang akong kalampusan,” matud ni Evelyn.

Gilamano ni Loreto si Evelyn ug gipahalipayan sa kadungganan nga iyang naangkon. “Sige Lyn, nalipay kaayo ko nga nakahuman ka na pag-eskuwela ug ikaw pa ang nanghawod sa inyo’ng klase.

Sigurado ko nga makabarog ka sa kaugalingon kun mangita ka’g trabaho unya. Kun mogradwar ka na, moundang na ko sa negosyo ug molangyaw ko sa Manila,” ni Loreto pa.

“Ha? Biyaan ko nimo Nong Retz?” (Sumpayan)