Feeling ulitawo

Dear Tita Salie,

Good morning. How are you? Hinaot happy kanunay ang imong adlaw. Just call me Jazz, minyo ug adunay mga anak. Bahin sa akong bana maoy problema nako. Minyo na man unta siya, Tita Salie, apan feeling niya mura’g ulitawo gihapon ug iresponsable kaayo.

Pasagdan lang kami niya nga iyang pamilya. Laagan kaayo, sak-an kanaogan lang mi niya. Kun akong estoryahan nga mangita’g trabaho, magpalingog-lingog lang. Unsay angay ko’ng buhaton? Tita Salie palihug pasabta ko.

* * *

Hello Jazz,

Good morning. Mahimo gayud nga dili hapsay ang dagan sa pamilya kun ang bana wala magtagad pag-ayo sa iyang gidala nga papel isip bana. Apektado niini ang panginabuhian ug sustansiya sa mga anak sanglit siya maoy ulo niini.

Maampingong susiha, Jazz, ang rekord sa Balaang Kasulatan sa Proverbio 21:17 nga nag-ingon: “Siya nga nahigugma sa paglipaylipay maoy modangat sa kawalad-on; siya nga nahigugma sa bino ug lana dili makabaton og bahandi.” Sultihi siya, Jazz, nga mas importante ang pamilya kay sa paggahin og daghang oras sa barkada. – Tita Salie