Ungo ang apohan ni Kapitan Justo

Mao karo’y gikahadlokan sa taga Sityo Salin-Kabog ang pagsige’g pamalbal sa usa ka mangtas nga ungo. Duha na ang nabiktima sa bangis nga mangtas. Ang una mao si Florencio ang manananggot kinsa gisuyopan og dugo ug unya gipaak ang dapit sa iyang liog.

Dayon si Sonia, ang masahista sa usa ka massage parlor sa siyudad. Magabii man gud ang oras nga mopauli si Sonia sa ila. Taga dinhi siya sa sityo Salin-Kabog ug sa sunod bulan mao na ang iyang schedule nga molarga na kini sa Japan isip entertainer didto. Ug mao kini karo’y problema sa mga lumolupyo dinhi sa sityo ug si Kapitan Justo nangusog na pag-ayo nga madakpan ang ungo. Iyang gibahinbahin ang mga tanod niya aron gyud pagdakop sa ungo kun moatake na kini pag-usab.

“Kinahanglan nga wala tay tulganay niini, kapitan,” ni Henyo pa nga maoy hepe sa mga tanod. “Hangtod magbuntag ta, pulipuli ug ugma sa gabii, lain na pud ang mobantay ug maglibutlibot dinhi sa matag suok sa atong sityo. O di ba libuton ang tibuok baryo.”

“Mao gyud nay buhaton nato,” kalma ang tingog ni kapitan.

“Kapitan, may nag-ingon nga duna kunoy pamilya dinhi nga kaliwat og ungo,” ni Samson pa nga tanod usab.

“Kinsa man kuno nang pamilyaha, ha, Samson?” mitutok si kapitan kang Samson.

“Ug kinsa may nagsulti nimo ana?”

“Si Korak, siya ang nagsulti nako nga mao kuno nga duna nay ungo dinhi sa ato, kay nia ra kuno ang kaliwat sa mga ungo. Ug nahibawo siya, kapitan, kun kinsa kana sila,” miigham si Samson.

Wala motingog si Kapitan Justo. Mura’g dunay lawom nga gihunahuna.

“O, sige, pagbuwagbuwag na mo, magsugod na ta’g bantay.”

Wala dangti’g dugay didto sa may lugot may nadungog silang singgit nga nadakpan na kuno ang ungo. Nakita kini nga nagtuwad ug laksot kaayo’g nawong.

Matud pa si Kolas kuno, ang anak ni Baloryo ig-agaw ni Kapitan Justo. Midali dayon sila si kapitan og adto sa may lugot. Tuod, didto ilang nakita si Kolas nga gigapos na sa mga tanod.

Unya, dihay lanog nga tingog nga nag-ingon.

“Buhii, buhii ninyo si Kolas. Dili kana siya ungo. Hubog lang kana siya maong nagtuwad! Buhii ninyoooo!” tingog diay ni kapitan.

“Apan, Kapitan, ato na siyang nadakpan,  ato siyang nadakpan kay nagkadugo ang baba kay may gibalbal, kinsa kaha?” ni Samson. “Unya, atong buhian? Dili mahimo, ato siyang patyonnn!”

Nangisog si Kapitan Justo.

“Unsa man dili mo patuo nako! Kay taktakon ta mo sa pagkatanod!”

Gibuhian na lang si Kolas sa mga tanod. Unya nianang pagkasunod gabii ilang nasakpan si Kapitan Justo nga nagtuwad. (Kataposan)