Anak ni Hitler

Karon lang ko nakaamgo nga ang akong nabana, anak ni Hitler. Maong doble ang akong pasalamat nga human sa 17 ka tuig namong kaminyoon (nga puro Kalbaryo) nahukman sa husgado sa Germany nga divorced na mi.

Grabe gyud og kinaiya to akong bana nga German. Kining Pinay lagi ta. May pagkamartir. Gustong mausab siya. Apan igo na ang 17 ka tuig nakong pag-antos. Palahubog. Mamun-og kun mahubog. Selosong way kabutangan. Unya kun masakpan nakong namabaye, regalohan dayon ko’g dakong salapi para i-shopping ug ipamalit og alahas. Maayo moulog-ulog.

Wa say kabutangan ang kadawo ni Frank Strand. Kitang mga Pinay mangambisyon tang makabana og foreigner aron makatabang sa atong pamilya. Apan kadto siya, bisa’g peso di modugo. Hinoon, nakatabang ko’s akong mga ginikanan ug mga igsoon. Gikan sa akong tinarbahoan. Kay human namo’g kasal sa Germany, gipaeskuyla ko ni Frank didto. Pagkahuman, nakatrabaho ko isip clerk sa usa ka banko.

Ang pinakangil-ad gyud nga batasan niya nga di nako maagwanta, kanang ang asawa tratahon nga mutsatsa. Pakauwawan ka atubangan sa iyang mga bisita.

Nagpasalamat sab ko nga wa mi nanganak. Nagpa-vasectomy na man siya. Ako unta ang gusto nga manganak mi.Kay nindot ma’g resulta ang mestiso o mestisa Pinay-German. Apan maayo ra sab nga wa. Kay ang iyang duha ka anak sa una niyang asawa nga German, nagdumot man sab niya. Tungod sa ka-Hitler og kinaiya.

Kontra sab ni Frank iyang inahan. Kay anak siya sa pagkadaga sa iyang inahan nga kaniadto kusinera ni Adolf Hitler. Di gyud motug-an iyang mama kun kinsay iyang amahan.

Unya dihang gikasal akong pag-umangkon nga si Sonia, gipatambong ko sa inahan nga si Adela akong maguwang. Nipauli ko sa Pilipinas. Lima ko ka adlaw sa balay ni Adela sa Banawa. Nakalugar ko’g tan-aw sa ilang big screen Cable TV. Naatol nga sa National Geographic Channel, gisalida ang kaagi ni Hitler.

“Ana, Gina! Tan-awa ra gud o!” sampit ni Adela nako usa ka buntag nga gikan kong nag-hike.

“Unsa man?” nako pa. Gitudlo niya ang screen sa TV. Nakita nako ang hitsura ni Hitler. Dako kaayong pagkaliwat si Frank. (Katapusan)