Tim-os nga pagbati

Gula 6

Nahingawa si Evelyn nga nagtan-aw sa pamayhon ni Loreto nga nasabot niya nga nagpaluyahon.

“Naunsa ka diay Nong Retz? Mangaon na unta ta kay nakaluto na si Nang Sebia,” matud ni Evelyn nga miduol ni Loreto.

Luya kaayo si Loreto. “Pag-una lang mo’g kaon si Sebia kay mopahuway usa ko, gihilantan g’yud ko Lyn,” giingnan ni Loreto ang dalaga nga iyang sinuportahan sa pag-eskuwela.

Mibiya si Evelyn ug mibalik sa kan-anan nga nahingawa kaayo kang Loreto. Iyang gitug-anan si nang Sebia sa kahimtang sa ilang amo. Nahingawa usab ang kusinera sa kahimtang ni Loreto.

“Nindot unta nga masahean si Dong Loreto kun kamao pa ko,” matud sa tiguwang nga kusinera.

“Tuod no? Ako man ang tigmasahe ni Lolo ug Lola kaniadto kun abuton sila og kakapoy sa pagtulod sa kareton. Ako diay nga masahean si Nong Loreto inighuman nato’g kaon Nang,” giingnan ni Evelyn ang kusinera.

Paghuman og kaon nila ni Evelyn ug Nang Sebia, milakaw ang dalaga ug mipalit kini og panghaplas sa gamay’ng botika sa unahan. Dali ra siya nga nahibalik ug giingnan niya si Nang Sebia nga masahean niya si Loreto.

“Sige day aron mahuwasan tawon si Dong Loreto sa hilanat. Siguro ko nga dala ra kana sa kakapoy,” matud sa kusinera nga nanghugas sa ilang kinan-an.

Gituktok ni Evelyn ang pultahan sa kuwarto ni Loreto. “Kinsa na?” maluyahon kaayo ang tingog ni Loreto. “Ako ni Nong Retz, mosulod ko ha kay ako tika nga masahean,” ni Evelyn pa.

Nagkurog si Loreto sa katugnaw. “Maantigo ka diay nga momasahe Lyn?” (Sumpayan)