Tim-os nga pagbati

Gula 3

Misiga ang mga mata sa Lolo sa dalagita nga si Evelyn diha nga iyang nakita nga gitunolan sa junkshop owner og P500 ang iyang apo.

“Ayaw kataha day, dawata kini’ng five hundred kay tabang nako kini nimo. Karong tingbukas sa klase, pagpa-enrol kay ako’y mobayad sa tanan nimo nga obligasyon,” giingnan ni Loreto si Evelyn.

“Dawata na day, unya pasalamat ni Dong Loreto kay tabangan ka pa niya nga makapadayon sa pag-eskuwela,” matud sa apohan sa dalagita. Human matimbang ni Loreto ang mga dala nga puthaw, mga lata sa apohan ni Evelyn, gibayran dayon kini ug namiya sila nga mapahiyumon.

Pagkaugma sa hapon, kauban gihapon sa tiguwang ang iyang apo nga nagtulod sa karomata nga gisudlan sa ilang mga napunit nga mga puthaw, lata ug mga plastik. Gisugat kini og pahiyom ni Loreto ang tiguwang ug ang iyang apo.

“Wala ka g’yuy angay nga motulod niana’ng karomata day Evelyn kay guwapa ka gud. Anhi na lang trabaho sa akong shop mentras wala pay klase,” giingnan ni Loreto ang dalagita nga apo sa suki niya nga tigbaligya og mga scrap.

“Mas maayo pa tuod Lyn. Dinhi kang Dong Loreto maayo ang imong kahimtang kay nasuheto na ko sa iyang batasan,” matud sa apohan sa dalagita. Mitangdo ang dalagita nga si Evelyn.

“Ugma na lang sa buntag ko mobalik kay andamon pa nako ang akong mga sinena kay anhi man kaha ko moestar,” matud ni Evelyn. Tuod, pagkaugma sa buntag, wala sipyata ni Evelyn ang iyang gisaad, mibalik siya sa junkshop ni Loreto.

Si Evelyn maoy gitugyanan ni Loreto sa paglista sa mga matimbang nga puthaw ug ubang scrap materials, ingon man ang kantidad nga bayranan. (Sumpayan)