Jezebel

“Wala ko mahimutang sa imong pagkahanaw didto sa ato, Jezebel. Mura ko‘g mabuang. Misamot ang akong kabalaka diha’ng dili ko na ikaw makontak,” matud ni Edward.

“Giilisan nako ang simpack sa akong cellphone aron dili na ko nimo makontak. Niadto’ng higayona, gusto ko na’ng kalimtan ka sa dayon,” akong giingnan si Edward.

Nahilom mi sa makadiyot. Paglabay sa pipila ka daklit, si Edward ang una’ng mitingog. Nagkurog ang iyang tingog nga nangutana kanako.

“Wa ka ba diay mahigugma kanako, Jezebel?”

Wala ko motingog. Akong gisuta sa  akong kaugalingon kun may pagbati pa ba ko alang kang Edward.

Sa makadiyot, nahikalimtan ko na siya diha’ng miabot si James sa akong kinabuhi. Apan karon nga nagkita kami pag-usab, akong natugkad nga mas bug-at si Edward kay kang James alang kanako.

Si Edward man gud ang akong first love. Dili g’yud diay mamatay ang una’ng gugma!

“Dili ta magpaapekto sa nahitabo sa atong mga ginikanan, Jezebel. Dili ta sila himuong babag sa ato nga pagminahalay,” matud ni Edward.

“E-Edward...” Mao ray akong nalitok dayon nga gakus kaniya’g hugot kaayo.

Wala ko kapugngi ang akong mga luha. Nakahilak ko tungod sa kalipay nga wala diay masilag si Edward kanako. (Sumpayan)