Sulagma nga deyt - Gula 7

Malipayon si Jenny sa ilang panag-uban sa balaknon nga si Aldrin. Ganahan kaayo maminaw si Jenny ug mga pulong nga may pagka balak tungod kay makapahinumdom kini kaniya sa iyang amahan nga mobalak kun pabaligyaon kini og buwak atol sa kalingawan didto sa Bohol.

Gaan kaayo ang buot ni Jenny ngadto kang Aldrin ug mao nga wala niya kini paantusa ug iyang gisugot ang ulitawo sa pagpanguyab niini kaniya atol sa ilang wala tuyoa nga panagdeyt atol sa Valentine’s Day.

“Kumusta na kaha ron ang imong amigo ug ang akong amiga nga nagdeyt ‘sab sa unahan,” giingnan ni Jenny si Aldrin. “Pasagdi to sila, nag-enjoy ‘sab kadto sila sa ilang panagdeyt isip Valentino ug Valentina,” ni Aldrin nga mihawok pag-usab kang Jenny.

Natan-aw ni Aldrin nga lapad ang bermoda nga mitubo ilawom sa labong kaayo nga mga bombil. Gihawanan kini ni Aldrin ug mainampingon siya nga mihigda. Anam-anam nga gigabling ni Aldrin si Jenny ug gipaunlan kini sa iyang wala nga bukton.

“Hala, may makakita gani nato dinhi magtuo unya sila nga duna kita’y gihimo nga dautan. Dili kita nila makita kay baga kaayo ang mga dahon sa bombil nga miyungyong ug maoy nagsalimbong kanato,” dali nga tubag ni Aldrin.

Apan kalit lang nga mi-brown out. Naninggit ang mga tawo didto sa Plaza Independencia apan ang mga nag-deyt sa Fort San Pedro hilabihan ka hilom, apil na sila si Jenny ug Aldrin.

“Mas nindot kaayo nga nag-brown out kay ang kahayag sa buwan ra maoy mihatag og dan-ag. Mosamot nga dili kita makita dinhi sa atong nahimutangan Jen, makapabuot ta unsa’y atong himuon,” matud ni Aldrin. (Sumpayan)