Magsige’g damgo

Dear Tita Salie,

Just call me Joel, ulitawo. Dugay na mi’ng nagbulag sa akong uyab. Medyo gisakitan ko sa bag-ohay pa lang apan salamat sa Diyos kay karon naka-move on na ko ug medyo wala kaayo ko maglisod sa akong situwasyon. Apan ang nakahasol nako, Tita, kay magsige man hinuon ko’g damgo sa akong kanhi uyab nga unta dugay na man mi nga nagbulag. Unsa may buot ipasabot niini? Nahigugma pa kaha siya nako? Palihug pasabta ko sa akong buhaton. Daghang salamat sa imong pagtagad.

Dear Joel,

Wala’y nasayud kun nahigugma pa ba siya kanimo ug kun unsay buot nga ipasabot sa imong pagsige’g damgo niya. Tungod kay bisan atong basehan ang book of dreams or meaning of dreams, dili man g’yud moigo ang uban. Busa dili g’yud ko makaingon nga in-love pa siya nimo, o kaha ikaw ang kanunay pa’ng naghunahuna niya.

Sa ingon nga mga situwasyon wala ka’y laing mahimo kun dili ang paglitok og mga pulong sa pag-ampo pahinungod sa tawo nga imong gidamgo nga unta malipayon siya ug bubuan unta siya sa mga grasya nga iyang gikinahanglan karon kun unsa mang matang sa kinabuhi nga anaa siya karon.

Kun curious g’yud ka kun unsa na’y dagan sa iyang life ug kun gusto g’yud nimo siya’ng pangumostahon, puwede nimo siya’ng pangitaon diha sa mga social networks. Puwede nimo siya nga mahimamat without the intention nga magbalik pa mo kun dili pangumostahon lang. Ayaw na kakugang kun makadamgo ka niya kay nahimo man siya’ng parte sa imong mga kasinatian. Magdamgo man gani ta sa tawo nga wala pa nato ikaila unsa pa kaha siya.

-- Tita Salie