Sulagma nga deyt

Gula 5

Pareho sila si Aldrin ug Jenny nga nakagusto sa awit ni Kenny Rogers nga nag-ulohan og Lady.

“Jenny, ikaw maoy akong Lady karong gabhiona atol sa Valentine’s Day ug unta mahimo ko ikaw nga lady hangtud sa hangtud,” giingnan ni Aldrin ang iyang Valentina.

Nasabtan ni Aldrin nga nalipay kaayo si Jenny nga nakadungog sa iyang mga pulong. “I love you Jen. Sa una ko pa lang nga pagkakita nimo kaganina, nabihag mo dayon ang akong kasing-kasing,” matud ni Aldrin.

“Abtik g’yud kaayo ka sa mga tsiks no? Daghan ka na g’yud tingali og mga tsiks nga nabiktima,” matud ni Jenny apan mapahiyumon siya ngadto sa iyang Valentino.

Nakapahiyom usab si Aldrin apan namalibad nga dili tinuod nga palakero siya nga pagkatawo. “Bililhon kaayo nako ang paglitok sa pulong I Love You, mao nga kun wala ka pa Jen, sigurado nga firing range g’yud unta mi si bai Emil.”

Nakakatawa si Jenny nga nakadungog. “You’re so funny and joker kaayo.” Bilyako g’yud kaayo ang operator sa barko nga nag-angkorahe sa pantalan kay ang iyang mga gipatugtog nga awit pulos gayud alang sa Valentine’s Day.

Pareho nga nakapahiyom sila si Jenny ug Aldrin pagkadungog sa awit nga My Funny Valentine. “Sige na Jen, sugta na ko aron maka-kiss na ko nimo,” nagpahiyom si Aldrin nga mipislit-pislit sa bukton sa dalaga.

Mitutok si Jenny kang Aldrin. “I love you too Aldrin,” kalma kaayo nga gilitok ni Jenny ang mao nga mga pulong. Sa una nga higayon gigakus pag-ayo ni Aldrin si Jenny. (Sumpayan)